Breudwd Welsh Prose 1300-1425
Cymraeg

BL Harley MS. 4353 – page 33v

Llyfr Cyfnerth

33v

E Neb a latho kath a warchatto yscubaỽr
brenhin. neu a|e dycco ledrat. y phen
a ossodir y waeret ar laỽr glan gỽastat. A|e
lloscỽrn a drychefir y vynyd. Ac odyna din+
eu graỽn gỽenith ymdanei. hyny gudyo
blaen y lloscỽrn. Kath arall; pedeir kein·ha  ̷+
ỽc. kyfreith. a| tal. Teithi kath. kymeint yỽ a|e
gỽerth kyfreith. Teithi kath yỽ y bot yn
gyfglust gyflygat gyfloscỽrn gyfdanhed
gyfiewin. Ac yn diuan o tan. A| llad llygot
Ac nat ysso y chanawon. Ac na bo kath·deric
ar pop lloer.
NY byd dirỽy am gi kyn dyccer ledrat.
na camlỽrỽ. Llỽ vn dyn yssyd
digaỽn y wadu ki. kanys beich kefyn yỽ o
lỽdyn anhyys. O|r kyrch ki neb dyn yr keis  ̷+
saỽ y rỽygaỽ. kyt llatho y dyn y ki ac aryf
o|e laỽ. ny thal na dirỽy na chamlỽrỽ ymda  ̷+
naỽ. O|r brath ki neb dyn hyny del y gỽaet.
talet perchennaỽc y ki waet y dyn. Ac o|r llad
y| dyn rỽygedic y ki hagen heb symut ody  ̷+
na; ny cheiff onyt vn ar pymthec aryant.
Ki kynefodic a rỽycco dyn teir gỽeith. on  ̷+
ys llad y perchennaỽc. kyfreith yỽ y rỽym  ̷+
aỽ ỽrth troet y arglỽyd dỽy ryỽhant y ỽrthaỽ