Breudwd Welsh Prose 1300-1425
Cymraeg

Cardiff MS. 3.242 (Hafod 16) – page 49

Llythyr Aristotlys at Alecsander: Y Pedwar Math o Frenin

49

a|r neb a|e rodo y|r neb ny|s|haedo ac ny|s|dirpero. coỻedic
vyd amdanaỽ. ac y|mae yn|dineu y eidaỽ yny el hyt ar
lann y tlodi. a|chynhebyc yỽ y|r neb a|rodei uedyant y|elyn
arnaỽ e|hun. Y neb a|rodo y|eidaỽ myỽn amser y|r rei aghe+
nus; y ryỽ vrenhin hỽnnỽ yssyd hael ỽrthaỽ e|hun ac
ỽrth y werin. a|e vrenhinyaeth a geiff tagneued. a|e orch+
ymynneu a gedwir. Y ryỽ vrenhin hỽnnỽ a gamnolei
philosoffwyr gynt. Brenhin a rodei da y|deyrnas y|r
neb ny|s dirperei arnaỽ ac y|r|rei diaghen. hỽnnỽ yssyd
dinustrỽr ar|y goludoed kyffredin. a heuyt ar|y deyrnas
e|hun. ac anteilỽng yỽ y|wledychu. anteilỽng oed o|r parth
araỻ bot enwedigaeth brenhin idaỽ o|e vot yn gebyd.
ac o|r achaỽs hỽnnỽ na bot yn|ry|gebyd nac yn ry|hael
nyt da. Dewisset brenhin annỽyl dirgel idaỽ yr hỽnn y
gossotto y|dryssor yn|y gadwiraeth y rodi ac y|dreulaỽ y da+
oed kyffredin megys y|dywedassam ni o|r blaen. Y chỽi
alexander yd ỽyf yn menegi pa vrenhin bynnac a|dreulo
yn anuessuraỽl daoed y deyrnas yn ynuydrỽyd maỽr y
  [ bernir.