Cardiff MS. 1.362 (Hafod 1) – page 31r
Brut y Brenhinoedd
31r
y teyrnas. a llunyaethu pop peth yn dylyedus. A gỽedy eilen+
wi o veuruc y vuched y deuth. koel y vab ynteu yn vrenhin
yn|y ol. Ac yn rufein y magyssit koel a moes gỽyr rufein
a|e deuaỽt a dyscassei. Ac ỽrth hynny yd oed ynteu yn rỽy+
medic o|e karyat ỽynt ac yn talu teyrnget udunt heb
y warauun kans yr holl vyt a|welssei yn yr amser hỽnnỽ yn
darystygedic vdunt. ac ar vyrder ny bu yn ynys prydein
vrenhin well a ynrydedei dylyedogyon y teyrnas no choel
nac a|e katwei yn hedychach. Ac vn mab a anet idaỽ. sef
oed y enỽ. lles. A gỽedy marỽ koel y deuth lles y vab yn vren+
hin ar holl weithredoed da y tat a erlynỽys Ac a|wnaeth
yn gymeint ac y tebygit mae ef oed koel e hun a medyly+
aỽ a wnaeth hyt y gallei vot yn well y diwed noe dechreu
Ac anuon a|oruc hyt ar eleutherius pab y erchi idaỽ dan+
uon attaỽ wyr ffydlaỽn a prygethei idaỽ gristynogyaeth
a chret a bedyd. kans gỽyrtheu a|wnathoed yr ebystyl yn pre+
gethu ar hyt y byt a|daroed udunt kyffroi a golehau y gal+
lon a|e vedỽl ar dvỽ. Ac ỽrth yd oed ynteu yn damunaỽ gỽir
ffyd o dihewyt y vryt. Ac ynteu a|e kauas. A gỽedy gỽelet o|r
pap y greuydus damunet sef yd anuones attaỽ deuỽr greuy+
dus ffydlaỽn dyscotron seiledic yn|y lan ffyd gatholic y bry+
gethu idaỽ ac yỽ pobyl dyuodedigyaeth yr arglỽy* iessu grist
yg knaỽt ac golchodigyaeth ỽynteu trỽy lan ffydlaỽn
vedyd. Sef oed enwe y gỽyr. Dunan. a phagan. A gỽe+
dy dyuot y gỽyr da hynny y ynys prydein a phregethu
y les vab koel a|e vedydyaỽ a|e ymchoelut ar grist
o|e holl gallon a dechreu a oruc y bobyl yn|y lle rydec
attadunt ac o dysc ac agreifft eu brenhin credu y
duỽ ac eu bedydyaỽ yn enỽ iessu grist trỽy ffyd ka+
| « p 30v | p 31v » |