Breudwd Rhyddiaith Gymraeg 1300-1425
English

Caergrawnt, Llsgr. Coleg y Drindod O.7.1 – tudalen 25r

Llyfr Blegywryd

25r

Ac ỽrth hynny gỽaet dyn yssyd lei y
werth. Gỽerth rac·dant dyn. pedeir
ar hugeint gan tri drychafel. Gỽerth
kildant dyn; dec a deugeint aryant.
Pan talher racdant; gỽerth creith
o gyfarch a telir gantaỽ. Gỽerth
creith o gyfarch ar ỽyneb dyn; wheu  ̷+
geint yỽ. Os ar y laỽ. trugeint a|tal.
Os ar y troet y byd; dec ar hugeint
a|tal. Sarhaet dyn pan adaỽher
creith ar y troet a telir gyt ac vn
drychafel. Os ar y laỽ y byd; gan
deu drychafel y telir. Os ar y ỽyneb
y byd; gan tri drychafel y telir
OR trewir dyn ar y pen hyt pan
welher yr emhenhyd. neu or
brethir yn|y arch. hyny del y amyscar
y maes. neu torri ascỽrn mordỽyt
y dyn. neu ascỽrn y vreich. dros pob
vn o hynny; teir punt a telir idaỽ
canys ym|perigyl oe eneit y byd o
pob vn o hynny. Hyn a telir y vra+
thedic y bo reit idaỽ weith medyc.
gyt ae sarhaet. pedeir keinhaỽc dros
padell y wneuthur medeginyaeth.