Breudwd Rhyddiaith Gymraeg 1300-1425
English

Caergrawnt, Llsgr. Coleg y Drindod O.7.1 – tudalen 24r

Llyfr Blegywryd

24r

MOdrydaf gwenyn; pedeir ar|hugeint
a tal. kyn heit; vn ar pymthec a
tal. Eil heit; deudec keinhaỽc a tal.
Tryded heit; ỽyth keinhaỽc a tal. Heit
a del o kynheit. deudec keinhaỽc a|tal.
Heit yr eil heit; ỽyth keinhaỽc a tal.
ac yn|y gỽerth hỽnnỽ y bydant hyt ỽyl
yr holseint. Pob heit o gyn noc aỽst
hyt wedy gỽyl yr holseint. vn werth
vydant. nyt amgen; pedeir ar|hugeint.
Or a heit wedy calan aỽst y maes.
asgell·heit uyd. ac ny thal onyt pedeir
ar|hugeint. Modrydaf gỽedy yd el y
kynheit o·honei. vgeint a tal. Gỽedy
yd el yr eil heit o·heni. vn ar pymthec
a tal. Gỽedy yd el y tryded o·heni. deu  ̷+
dec keinhaỽc a tal. Gỽenyn·llestyr;
deu sỽllt a tal. Bydaf yn|y coet; deu
sỽllt a tal. Or dygir bydaf ledrat. A
thorri y pren y bo yndaỽ. gỽerth y pren
a gỽerth y vydaf a telir y arglỽyd y
pren. Y neb a gaffo bydaf os dengys
y arglỽyd y tir; pedeir keinhaỽc ae
ginyaỽ a geiff. neu y cỽyr. Ny thal neb
heit onyt pedeir keinhaỽc. hyny uo