Breudwd Rhyddiaith Gymraeg 1300-1425
English

Caergrawnt, Llsgr. Coleg y Drindod O.7.1 – tudalen 12v

Llyfr Blegywryd

12v

rodi oet heb y ganhat dros yr oet
kyntaf. Eil yỽ o talu y dylyet. Try+
dyd yỽ o dỽyn gauael am y dylyet.
Oet mach y ỽybot ae mach ae nat
mach; tri diheu. Reit yỽ dyuot
teir llaỽ y gyt ỽrth rodi dyn yn vach.
llaỽ y mach a llaỽ y neb ae rotho
yn vach. a llaỽ y neb ae kymero. Ac
ymffydyaỽ o laỽ. y laỽ. or byd eisseu
vn llaỽ o hynny yn ymffydyaỽ. ba+
laỽc vechni y gelwir honno. eithyr
y lle yd el dyn yn vach kynnogyn.
drostaỽ e hun neu dros arall nys
rotho yn vach. Ansaỽd balaỽc yỽ;
bot y neill pen idaỽ yn rỽym ar
llall yn ryd. Ac ỽrth hynny or kym+
her y dylyaỽdyr ffyd y talaỽdyr ar
talu y dylyet. a ffyd y mach ar gym+
ell y talaỽdyr. pob vn ohonunt a dy+
ly gỽrtheb oe amot yr dylyaỽdyr.
Ony  chymher onyt ffyd vn o+
honunt. ny dyly onyt vn ỽrtheb
idaỽ. heuyt or dyry mach ffyd yr
dylyaỽdyr ar gymell y dylyet idaỽ;