Llsgr. Amwythig 11 – tudalen 139
Breuddwyd Pawl
139
pỽẏ ẏ rei hynn a dywetut a oruc ẏr
aghel ẏ rei hẏn a dremẏgẏssant ẏ
gwedỽon a|r ẏmdiueit ac ẏ wnay+
thant ockẏr ac nẏ buant trugara+
ỽc a|than ẏn llosci ẏ|neill hanner
ẏdunt a|r hanner arall ẏn rewi Ac
ẏ gwelẏnt luossogrỽẏd o dẏnẏon
ac amrẏfalẏon vỽẏdeu ẏn|ẏ kẏlch
ac nẏ ellẏnt gymryt dim ohonaỽ
a gouẏn a oruc paỽl ẏ|r agel pỽẏ ẏnt
ẏ rei racco ẏ rei a dalassant eu hum+
prẏt kẏn noc amser Ac ẏ gwelẏnt
yn lle arall llawer o wraged noethon
o dillat a|nadred a|than a Seirff ẏg|kẏ+
lch eu mẏnẏgleu a|r seirf ẏn gẏffredin
a|e kẏrn tanolẏon yn ffustaỽ ẏ gwra+
ged a gouyn a oruc paỽl y|r aghel p+
ỽẏ ẏ rei a lathassant ac a uodassant
eu plant ac ỽẏlaỽ a oruc paỽl a dẏ+
wedut gwae. gwae. gwae. ẏ|r pechaduryeit
| « p 138 | digital image | p 140 » |