Llsgr. Philadelphia 8680 – tudalen 66r
Brut y Brenhinoedd
66r
181
ac offric a|las a|e|deu nyeint y
rei a|dylyynt gỽledychu|gỽedy
ef. A|gỽedy ỻad y rei hynny
oswaỻt a deuth yn urenhin
yn yscotlont. ac a|ryuelaỽd ar
gadwaỻaỽn. ac a|e|dyrraỽd
kadwaỻaỽn ef ar|ffo o|le py
gilyd hyt y mur a|wnathoed
Seuerus amheraỽdyr y·rỽng
brytaen ac yscotlont. ~
Ac odyna kadwaỻaỽn a|an+
uonaỽd peanda a|r rann uỽy+
af o|r ỻu gantaỽ hyt y ỻe hỽn+
nỽ y ymlad ac oswaỻt. Ac y+
sef a|oruc ynteu hyt tra ytto+
ed peanda yn|y warchae yn|y
ỻe a|elwit yn|saesnec heuyn+
ffylt. ac yg|kymraec y ma+
es nefaỽl nosweith dyrchaf+
el croes yno yn arỽyd.
Ac erchi y gedymdeithon
a|e uarchogyon oc eu ỻaỽn
ỻef dywedut. Plygỽn an
glinyeu a gỽediỽn duỽ buỽ
hoỻgyuoethawc hyt pan
rydhao ef ni y gan syberỽ
lu y brytanyeit. ac y|gan
182
yr ysgymun dywyssaỽc pean+
da. kanys ef a|wyr mae iaỽn
yd|ym ni yn ymlad dros an ke+
nedyl. ac|ỽrth hynny paỽp o+
nadunt a|ỽnaeth megys yd|er ̷+
chis oswaỻt. Ac odyna pan
deuth y dyd y kyrchassant eu
gelynyon. a hỽrỽyd efyrỻit eu
ffyd ỽynt a|gaỽssant y uudu+
golyaeth. A gỽedy menegi
hynny y gadwaỻaỽn ỻidyaỽ
a|wnaeth. a chynnuỻaỽ ỻu
maỽr ac erlit oswaỻt. a|brỽyt+
raỽ ac ef yn|y ỻe a|elwit bỽrne.
Yna y kyrchaỽd peanda ef ac
y ỻadaỽd.
A Gỽedy ỻad oswaỻt a|ỻaỽ+
er o uilioed ygyt ac ef
o|e wyr. Oswi|aelwin y uraỽt
ynteu a|deuth yn urenhin
yn|y le. A hỽnnỽ a rodes ỻaỽ+
er o eur ac aryant y gatwaỻ+
aỽn. ac a|gauas tagneued y
gantaỽ. a gỽrhau idaỽ heuyt
a|ỽnaeth. Ac ny bu un gohir
ỽynt a|gyuodassant yn|y erbyn
alfryt y uab e|hun. ac odỽaỻt
| « p 65v | p 66v » |