Breudwd Rhyddiaith Gymraeg 1300-1425
English

LlGC Llsgr. Peniarth 9 – tudalen 54r

Ystoria Carolo Magno: Can Rolant

54r

iayth ar y deg bydin hyny ac ystondard eureit
hen ot o gỽbyl. Y dan y bryn hỽnnỽ y trigyỽys
marsli a|y niuer. A grandon ynteu a|y deg bydin
o hyt trayt y meirch a gyrchyssant y ffreinc a
honni y kychwyn o vil o gyrn. A phan doyth y
godỽrd hỽnnỽ ar y ffreinc kythrudyaỽ a wna+
ythyant o darogan eu hangheu a|chỽynaỽ pob
vn ỽrth y gilid onadunt. Ac ỽynt yn|y gỽyn+
van honno eu didanu a oruc yr archescob ud+
unt ac adaỽ llewenyd gỽlat nef yr goreu a
ymladei o·nadunt. Ac adaỽ poyn uffern y a
ffoei o·nadunt. Ac ymgadarnhau ar hyny
a oruc paỽb o·nadunt ac y·madaỽ yn gyuun
hyt na ffoynt byth. Ac ar hyny dodi gaỽr ar vy+
nyd llewenyd ac ym·gyrchu ar paganyeit. Ac
ar hyny cliborinus y pagan cadarnhaf o|r byt.
a rac·vlaynỽys y gedymdeithyon a|dỽyn ruth+
ur y engeler o wasgỽyn a|y vrathu a gỽayỽ
drỽy y daryan ay luryc a|thrỽydaỽ y hun a dy+
gỽydaỽ y ar y varch yr llaỽr a buched tragy+
wyd a gymerth engeler. Ac ar hyny y bu+
dygaỽl a dodes gaỽr. haỽd yỽ goruot heb ef
ar y ffreinc ymledỽch gedymdeithyon a|chan
ymlad torrỽch vydinoyd y ffreinc. Ac ar
hyny ymoralỽ a oruc Rolond ac oliuer a ge+
dymdeith da heb ef a wely di veint y collet ry
damweinỽys yn ni ry lad engeler. Ny ỽn ni
heb yr oliuer medeginyayth ỽrth y collet hỽn+
nỽ amgen noy dial yn vuan a|chan ganhorthỽy