Breudwd Rhyddiaith Gymraeg 1300-1425
English

LlGC Llsgr. Peniarth 9 – tudalen 34r

Ystoria Carolo Magno: Can Rolant

34r

*yn diannot. Ac yn|y ol ynteu y deudec gogyf+
urd a|thỽrpin archescob a llawered gyt ac ỽy
o|r a oyd honneit ac amlỽc bot grỽnwal* ke+
dernyt gantunt. Ac yn vn voment Sef oed
hyny deugeinuet ran aỽr yd ym·gynnullys+
sant y gyt a rolond vgein mil o wyr da. pan 
oyd digaỽn gantaỽ ynteu caffel mil o wyr grym+
mus ny allỽys eissoys gỽrthad* o|y gedymdei+
thas y saỽl wyrda hyny yn ym·gynnic idaỽ.
Ac yna y rybudyaỽd rolond gỽallter y ffydlo+
naf gedymdeith ef herwyd meint y ymdir+
et yỽ ffodlonder a|y ỽrogayth idaỽ ymlayn
paỽb yn|y mod hỽn. Kerda yn gyulym vy
ffydlaỽn i a chymer vil o gedymdeithyon. Mi
a dylyaf bot yn vuyd waredaỽc yt heb y gỽall+
ter ac na synnya yn llesc yn|y gỽassanayth hỽn.
A chyn teruynu y atteb brathu y varch y rag+
ot y mynyded ar ffyrd y gyt a mil o gedym+
deithon. Oger o denmarch ynteu a raculay+
nỽys yn geitwat o vlayn y niuer a ayth y
ffreic* ac ychydic o riuedi y gyt ac ef canyt
oyd reit perigyl hayach yn|y geitwadayth
honno. Rolond ynteu a edewit yn yr yspayn
a llawer y gyt ac ef o wyr deỽr clotuaỽr. A|phan
ytoydynt yn kyrchu glynneu y mieri. na+
chaf vrỽydyr diarỽybot udunt drỽy vrat
gỽenwlyd. Mynyded uchel a glynneu issel
godywyll y dan y mynyded a fford dyrys ky+
uyg a garỽ y peth a vlinhaei yn aỽr llu ffreinc

 

The text Ystoria Carolo Magno: Can Rolant starts on line 1.