Breudwd Rhyddiaith Gymraeg 1300-1425
English

LlGC Llsgr. Peniarth 6 rhan iv – tudalen 30

Geraint

30

ac ỽynt glas·was ieuanc goaduein a|thỽel am y vynỽgyl
a bỽrn a welynt yn|y tỽel. Ac ny wydynt ỽy beth oed. a phis  ̷+
ser glas bychan yn|y laỽ. a ffiol ar ỽyneb y pisser. A chyf  ̷+
arch gỽell a oruc y gỽas y ereint. Duỽ a|rotho da itt heb·y
Gereint. o py le pan deuy. pan deuaf o|r dinas yssyd y|th vla  ̷+
en racco. Arglỽyd ae drỽc genhyt ti heb ynteu gofyn
it o py le pan deuy titheu. Na drỽc heb·y Gereint. pan deu  ̷+
af trỽy y coet racco. Nyt hediỽ y doethost trỽy y|coet.
nac ef heb·y Gereint. yn|y coet y buum neithỽyr. Mi a|te  ̷+
bygaf na bu da dy ansaỽd neithỽyr ac na chefeist na
bỽyt na diaỽt. na·do yrof|i a duỽ heb·y Gereint. A wney ti
vyg kyghor i heb y gỽas kymryt y·genhyf|i dy ginyaỽ.
Py ryỽ ginyaỽ heb·y Gereint. Boreuỽyt yd oedỽn yn|y anfon
y|m paladurwyr racco nyt amgen bara a chic a gỽin.
Ac os mynny ti ỽrda ny chaffant ỽy dim. Mynnaf heb+
y Gereint a duỽ a|talho it. A disgynnu a oruc Gereint. A chym  ̷+
ryt o|r gỽas enyd y|r llaỽr. Ac ymolchi a orugant a ch  ̷+
ymryt eu kinyaỽ. A|r gỽas a|tauellaỽd y bara ac a|rodes
diaỽt udunt. Ac a|e gỽassanaethaỽd o gỽbyl. A gỽedy
daruot udunt hynny y dywaỽt y gỽas ỽrth ereint. Arglỽyd
gan dy ganhat Miui a af y gyrchu bỽyt y|r paladur  ̷+
wyr. Dos y|r tref heb·y Gereint yn Gyntaf y dala llety imi
yn|y lle goreu a ỽyppych ac ehagaf y|r meirch. A chymer
titheu yr vn march a vynnych a|e arueu gyt ac ef yn
tal dy wassanaeth a|th anrec. Duỽ a talho it heb y gỽas
a digaỽn oed hynny yn tal gỽassanaeth a uei uỽy no|r
vn a|wneuthum i. Ac y|r tref yd aeth y gỽas. a dala llety
goreu ac esmỽythaf a|wydyat yn|y tref a|oruc y ereint. A gỽe+