Breudwd Rhyddiaith Gymraeg 1300-1425
English

LlGC Llsgr. Peniarth 5 (Llyfr Gwyn Rhydderch, rhan 1) – tudalen 78v

Ystoria Carolo Magno: Chronicl Turpin, Ystoria Carolo Magno: Rhamant Otfel

78v

81

ar vyrder. a|r llyuyr hỽnn a ym+
hoeles madaỽc ap selyf o ladin
yng|kymraec. o adolỽyn a deis  ̷+
syf. gruffud ap maredud ap y  ̷+
ỽein vap gruffud ap Rys. ~
B Renhin yr ynyssoed an+
rededus brenhin yr ynys+
sed. Reinallt ardercha+
ỽc. brenhin yr ynyssed kenedyl  ̷+
aỽc yn tridyblyc o|wyrth. a gỽe  ̷+
ithret. a|chenedyl. a|myuy yn
gymelledic o|th arch di y|dechre+
ueis. i. y gỽeithret hỽnn. ar yr
hỽnn y dodỽn. i. teruynn pei na
bei rac keryd vy anallu. ac
ỽrth hynny y bu deỽissach gen+
nyf|i adaỽ y llyuyr hỽnn ynn
an·orffenn no|e ymhoelut o|th
arch di o rỽmans yn lladin yn
yr hỽnn ny chyfadefa vi vy mot
yn aỽdur namyn yn dyallỽr y+
storyaev. Ac ỽrth hynny ty+
dy leaỽdyr o cheffy di yn|llyf+
yr hỽnn dim agkredadun. nev
agkyfun y|r wironed. na liỽa
y|r golystaỽdyr namyn y aỽdur
y|gỽeithret kynntaf. cany dy+
lyir galỽ yn euaỽc datkanỽr
gev arall. namyn y|neb a|vo
dychymygyaỽdyr yr aỽdyr kyn+
taf y|r gev. ac o|r llyuyr lladin
hỽnnỽ yd ymhoelet hỽnn yg  ̷
kymraec. ~ ~ ~
A * phỽy|bynnac a vynho
gỽybot. neu warandaỽ
chỽedel grymus. o|wasta  ̷+

82

drỽyd y|vryt ymostecket. a
ninhev a|draethỽn idaỽ ef o
vlodev y chỽedlev. nyt amgen
noc y ỽrth y grymussaf char+
lys vab pepin hen brenhin fre+
inc yr amheraỽdyr bonhedic+
caf. a chyfoethockaf. ac ar+
derchoccaf goresgynnỽr gỽla+
doed anffydlonyon elynnyon
crist a vu eiroet yn ruuein.
A|r deudec gogyuurd freinc
y rei a ymgarỽys yn gymeint
ac nat ymwahanassant ei  ̷+
roet yny las. pan wnaeth
gỽenỽlyd eu brat y|r an·ffyd+
laỽn genedyl y paganneit.
Yn|yr vn dyd ef a|las onadunt
seith cant. ac vgein mil. am
yr hynn a gymerth charlys
yndaỽ diruaỽr dolur. a|thrist+
ỽch yny deuth y aghev yntev.
Y chỽedyl hỽnn gỽell yỽ. ac
odidogach. cany cheffir gann
veird. na chroessanneit rei
a beidỽys oll ac ef. am na ỽy+
buant dim y|ỽrthaỽ. namyn
canu y|danger. alandri y|neb
y gỽybuant y ỽrthunt. ac o|r
hynn a ellynt e|hunein y|dychy+
mygu. Ny ỽybuant hỽy ha+
gen dim o|r collet deissyueit
a|deuth y|r amheraỽdyr charlys
P An yttoed charlys
vrenhin freinc duỽ
gỽyl vil veib yn|y dinas
a|elỽir paris ỽedy ry gynnal o+

 

The text Ystoria Carolo Magno: Rhamant Otfel starts on Column 81 line 34.