Breudwd Rhyddiaith Gymraeg 1300-1425
English

LlGC Llsgr. Peniarth 5 (Llyfr Gwyn Rhydderch, rhan 1) – tudalen 75r

Ystoria Carolo Magno: Chronicl Turpin

75r

67

gen heb y caỽr pa furyf y|genis
y|tat y|mab mal y|dyỽedy di. a
gredy di heb·y rolond gỽneuthur
o duỽ adaf. Ceredaf heb y caỽr.
Mal na aanet adaf heb·y|ro  ̷ ̷+
lond y gan neb. ac eissoes ef
a|anet meibon idaỽ ef. y·velly
ny aanet duỽ tat y gan neb.
ac eissỽys ef a|anet y|vab ef
yn dỽyỽaỽl y|mynnỽys kynn
noc amseroed val na ellir y
datkanu. Da y|dyỽedy heb y|ca+
ỽr pa delỽ y bu dyn yn hỽnn a  ̷
uu duỽ. ny ỽn. i. dim ohonaỽ.
Yr hỽnn a|ỽnaeth nef a|dayar
heb·y rolond ac a greỽys pob
peth o dim. euo a|ỽnaeth y vab
yn dyn yn|yr vyry heb defnyd
gỽraỽl namyn o|e gyssegredic
yspryt ef. Yn hynny y llauur  ̷+
yaf|i heb y caỽr. pa delỽ heb
gyt gỽr y|genit mab o|wyry
mal y dyỽedy di. Duỽ heb·y|ro+
lond yr hỽnn a|furuaỽd adaf
heb gyt gỽr a gỽreic. yntev
a|ỽnaeth geni y|vab e|hun o|r
ỽyry heb gyt gỽr. Ac val y
ganet adaf heb vam o duỽ
tat. val hynny y ganet y vab
yntev o vam heb dyn yn tat.
idaỽ. Canys y|ryỽ anedigaeth
honno a|ỽeda y duỽ. Diruaỽr
geỽilyd yỽ gennyf|i heb y caỽr
pa delỽ y genit o wyry heb dyn.
Yr|hỽnn heb·y|rolont a|ỽna y
pryfyn y|myỽn y faen. aa|ỽna

68

tyuu pryf creadur y|myỽn y
prenn. a|llaỽer o byscaỽt ac a  ̷+
dar. a gỽenyn. a nadred heb gyt
gỽryỽ. Ynteỽ a|ỽnaeth y|r vorỽ  ̷+
yn ỽyry heb gyt gỽr geni duỽ
a|dyn. Canys y|neb a ỽnaeth
y|dyn kyntaf mal y dyỽeis*. i.
yn haỽd heb neb kyt dyn. Ha+
ỽd y gallỽys yntev ỽneuthur
geni y|vab yntev o|r wyry heb
gyt gỽraỽl. Ef allei heb y ca+
ỽr y|eni o|r ỽyry. ac os mab duỽ
eissoes yỽ ef mal y dyỽedy di.
ny allei y varỽ o|neb ryỽ mod
cany byd marỽ duỽ byth. Da
y dyỽedy heb·y|rolond. gallu o+
honaỽ eni o|r ỽyry. a chanys ga+
net credadỽy yỽ y anedigaeth.
a chredadỽy yỽ y varỽolyaeth.
neu y diodefedigaeth. ac odyna
y gyfodedigaeth o veirỽ. Pa de+
lỽ y gellit credu y gyfodediga+
eth heb y caỽr. canys a aner a
vyd marỽ heb·y rolond. A|r hỽnn
a uu varỽ a gyuodes y trydydyd.
a ryuedu yn vaỽr a|oruc y caỽr.
pan giglev y geir hỽnnỽ. ac at+
teb idaỽ val hynn. Rolond heb
ef gorỽac yỽ a|treitheist ỽrth+
yf hyt hynn. ny allei byth
gyuodi dyn o varỽ yn vyỽ. Nyt
mab duỽ e hun heb·yr rolond
a gyuodes yn vyỽ o varỽ. na  ̷+
myn o|r a|uu o dynyon o dechrev
byt. ac a vo hyt y diỽed a|gyf  ̷+
odant rac bronn y gadeir ef