Breudwd Rhyddiaith Gymraeg 1300-1425
English

LlGC Llsgr. Peniarth 5 (Llyfr Gwyn Rhydderch, rhan 1) – tudalen 131v

Ystoria Bown de Hamtwn

131v

289

weldy racco iuo yn dyuot a mae
dy gyghor ditheu kanys maỽr
yỽ vy ofyn na|chaỽn gyfur y
diagk. nac ỽyl di heb·y bonfei
y kyghor goreu a vetrỽyf mi
a|y rodaf. vn|braỽt yssyd y|iuor
y myỽn y castell a|elwir dabi  ̷ ̷+
lent a|brenhin kyuoethaỽc yỽ
a|baligraỽnt yỽ y enỽ. a|guedy
y|del iuor y myỽn aet boỽn
attaỽ a|managet idaỽ bot y
vraỽt yn|y castell. a|bot bren  ̷ ̷+
hin arall a|llu praf ganthaỽ
yn ymlad ac ef. ac ony chai
nerth yn ebrỽyd. y goruydit
ef ac y keit y castell heb olud.
a|chyt ac y clywo ynteu hyn  ̷ ̷+
ny ef a vyd trỽm ganthaỽ
y vryt ac a luydda ar hynt.
ac ef a|e holl allu gyt ac ef
a|gerdan tu a dabilent ac ny
thric gyt a ninheu wedy hyn  ̷ ̷+
ny onyt y·chydic o nifer. ac
yna y|gallỽn ddiagk yn|da.
llyna gyghor da heb·y boỽn
a|r gỽr a|wnaeth y ffuruauen
a|thifero ditheu rac pob drỽc.
ar hynny nachaf iuor a|r
brenhined ereill oll yn dy  ̷ ̷+
uot y|myỽn y|r llys a|e|hela

290

a|dangosses idi hi ar hynt. a gwe  ̷ ̷+
dy hynny edrych ar boỽn a wna  ̷ ̷+
eth ef a|gofyn idaỽ o ba le pan
hanoed ac o pa le pan dathoed y
palmer. arglỽyd heb ynteu
mi a|deuthum o nubie. varbari.
o|r inde. o aufric. o asie. ac ny bu  ̷ ̷+
um|i yn dabilent kany chaỽn
fford y myỽn. sef achos oed bren  ̷ ̷+
hin lỽmbardi a|e holl allu yssyd
yghylch y castell ac idrac yỽ y
enỽ de ualri. a|r gỽr bieu y cas  ̷ ̷+
tell yssyd y|myỽn. ac ony cheif
nerth a|chanỽrthỽy yn ebrỽyd
ef a|geir y ty arnaỽ ac ynteu
a|difetheit. Ygyt ac y kicleu
iuor hynny tarddu y gwaet
trỽy y eneu a|e dỽyffroen. M ̷ ̷+
hom heb ef os gỽr diuetha vyd
vy mraỽt i ny bydaf vyỽ i we  ̷ ̷+
dy hynny. ac erchi y baỽb gỽis  ̷ ̷+
gaỽ eu harueu. ac eu fford a|gy  ̷ ̷+
meryssant racdunt tu ac abilent.
a brenhin a edewis ef yn|y ol
y warchadỽ Josian a llỽyt oed.
a garsi oed y enỽ. a mil o varch  ̷ ̷+
ogyon a edewit gytac ef. Gỽe  ̷ ̷+
dy gwelet o Josian adaỽ garsi
o|e gwarchadỽ hi. trỽm oed gen  ̷ ̷+
thi y bryt a|drỽc oed y|chyssyr.