LlGC Llsgr. Peniarth 46 – tudalen 341
Brut y Brenhinoedd
341
hyt tu draỽ y humyr. a gỽedy ymlad ynn
drut ac yn|galet. colli llaỽer o|uilyoed o|ỽyr
catỽallawn. a|e gymell ar|ffo hyt yn Jỽerdon.
a cherdet a|oruc edỽin trỽy gyuoeth catỽ+
allaỽn gann lad. a|llosci. a gỽedy caffel o
gatỽallawn borth. keissaỽ dyuot a|oruc y. ynys. prydein.
a|phy|borthua bynnac y|delei edỽin a llu
yn|y|ludyas y|r|tir. canys deỽin oed y|edỽin
pilis enỽir oed y|enỽ. a|hỽnnỽ a|adnebydei
ar redec y|syr. ac ar|tỽrỽr* esgyll ydayar
yr adar y|damỽeinei a|delei rac llaỽ. a|hyn+
ny a|uanagei ynteu y|edỽin. ac ỽrth hyn+
ny ny allei catỽallawn. dyuot y ynys. prydein. ~
A Gỽedy gỽybot hynny o catỽallawn. a
thebygu na|chaffei byth dyuot y
.ynys. prydein. yd|aeth hyt at Selyf urenhin.
llydaỽ y|geissaỽ porth e gantaỽ megys y|ca+
ffei dyuot dracheuen. ac yn dyuot idaỽ
parth a llydaỽ. kyuodi gỽynt kethraỽl a|e
gỽasgaru hyt nat oed un llong udunt
ygyt a|e gilyd. a|diruaỽr ouyn a|gymerth
llyỽyd llong y|brenhin. ac ymdaỽ* a|e|lyỽ a
oruc. ac y buant uelly ar|naỽf yn gyhyt
| « p 340 | p 342 » |