LlGC Llsgr. Peniarth 46 – tudalen 340
Brut y Brenhinoedd
340
Emreis ỽledic. ac uthur|benn dragon. ac o+
dyna y gỽnaethant urat arthur gann
duunaỽ a|medraỽt yn|y erbyn. ac y|tor ̷ ̷+
rassant eu haruoll a|cheredic urenhin
ac y ducssant godmunt urenhin. yr affric
ar|y|torr. ac y deholet ynteu yn ỽaradỽydus.
A Gỽedy dyỽedut o ureint hir yn|y
ỽed honno y|bu ediuar gann catỽallawn
ỽneuthur dadleu o|r achos honno. ac anuon
a oruc ef at edỽin y|uenegi idaỽ nat ydoed
ef yn caffel yn|y gygor canhadu idaỽ yr hynn
yd oed yn|y erchi. canys deuaỽt oed er y|de+
chreu na bei yn. ynys. prydein. namyn un brenhin.
a|choron brenhinaeth idaỽ. ac na ellit kyn ̷+
nỽys deu urenhin ar o·symdeith un. a|lli+
dyaỽ a|oruc edỽin. ac adaỽ y|maes a|r dad+
leu. a|thygu trỽy y|lit y|gỽisgei ef coron
o anuod cadỽallawn. a gỽedy dyuot hynny at
catỽallawn. y|tyghaỽd ynteu trỽy y lit os gỽis+
gei ef coron yn teyrnas. ynys. prydein. y lladei yn ̷ ̷+
teu y|benn ef adan y|goron. ac o|hynny
geni teruysc yrydunt. a|gỽedy kynnullaỽ
lluoed o|bop parth dyuot erbyn yn erbyn
| « p 339 | p 341 » |