Breudwd Rhyddiaith Gymraeg 1300-1425
English

LlGC Llsgr. Peniarth 46 – tudalen 321

Brut y Brenhinoedd

321

hep ohir. ac ny dyỽeit y|llyuyr hysbysach
no hynny pỽy a|e lladaỽd. a chet bei trỽy
diruaỽr lauur. a gouut y bryttannyeit
a gauas y|uudugolyaeth. ac y|gỽasgarỽyt
gỽyr ruuein y|r coedyd. a|r mynyded. ac y|r
kestyll baỽp mal|y dyckei y|tyghetuen y|ge+
issaỽ naỽd am|y henetteu. a|e hymlit a|oruc
y|bryttannyeit a|e llad a|e daly. ac ereill ym+
rodi y garcharoryon. a|hynny a|ỽnaethpỽ+
yt o|dỽyỽaỽl trugared. canys y|ryeni ỽy
gynt a|ỽnaethoed yn trethaỽl udunt yn
engiryaỽl. ac ỽynteu heuyt o|e holl ynni
a|e keissassant. a gỽedy daruot hynny yd
erchis arthur gỽahanu corfforoed y|ỽyr ef
y ỽrth y gelynyon. a|e kyỽeiraỽ o|urenhin+
aỽl arỽylant. a|e hanuon y|uanachlogoed
y|gỽladoed e|hun. ac yna yd|anuonet corff
bedỽyr hyt ym peittaỽ. ac yn|y uynỽent y
parth deheu y|r|dinas y|cladỽyt ger llaỽ y ga+
er yn anrydedus. ac y|ducpỽyt corff kei
hyt yn angỽy. ac y|machlnachloc heremit+
ỽyr oed ynn|y fforest y|cladỽyt yn anrydedus.