Breudwd Rhyddiaith Gymraeg 1300-1425
English

LlGC Llsgr. Peniarth 46 – tudalen 293

Brut y Brenhinoedd

293

bot yn yaỽn y titheu gỽnneuthur yaỽn o|r
saỽl sarhaedeu hynny. Minheu a archaf y
titheu dyuot hyt yn ruuein erbyn dyỽ a+
ỽst nessaf y|ỽneuthur iaỽn mal y|barnno
sened rufein. arnat. ac ony deuy di yno ynn|y
teruyn hỽnnỽ. Ednebyd di y|deuaf|i y|th|er+
uyneu di. a|phy|beth|bynnac a gripdeileisti
o|th ynuyttrỽyd. minheu a|e dygaf drache+
uen yny bỽynt gymherued y cleuydeu yn
rannu yrom yn deu. ~ ~ ~ ~ ~
A |Gỽedy darllein y|llythyr rac bronn
arthur a|r|brenhined oed ygyt ac ef.
kyuodi a|ỽnaethant odyno parth
a|thỽr y|keỽri ỽrth talu attep am|y|gennadỽri
honno. a|thra yttoedynt yn|ysgynnu gradeu
y|tỽr. y|dyỽat cadỽr tyỽyssaỽc kernyỽ dan  ̷
chỽerthin ual hynn. hyt yn aỽr arglỽyd
hep ef y|bu diruaỽr ouyn arnaf|i. goresgyn
o|lesged y|bryttannyeit gann hir seguryt
trỽy ymrodi y|r gỽledeu. a|r meddaỽt. a|r
godineb. Canys o|r meddaỽt. a charyat y
gỽraged. a|r taplys y collir y|nerthoed. a|r