Breudwd Rhyddiaith Gymraeg 1300-1425
English

LlGC Llsgr. Peniarth 46 – tudalen 169

Brut y Brenhinoedd

169

eneu iarll oed hỽnnỽ ar ỽent ar ergig
ac euas y|geissaỽ idaỽ e hun y|urenhinaeth.
o|r diỽed. mynet hyt yg|kaer ỽynt lle yd
oed constans yn uynach y|map hynaf
y custennin oed hỽnnỽ. a|dyỽedut ỽrthaỽ
yn|y ỽed honn. constans hep ef. dy dat ti
yssyd uarỽ. a|th urodyr yssyd Jeueinc y
ỽneuthur brenhin onadunt. ac ny ỽel  ̷+
af|i o|th lin di a allo vot yn urenhinyn teil+
ỽg. ac ỽrth hynny o|r bydy ỽrth uyg
kyghor i. ac ychỽanecau medyant. a|chy+
uoeth y|minheu. mi a|ymhoelaf ỽyneb
y bopyl parth ac attat ti. ac a|baraf dy
tynnu ti o|r abit hỽnnỽ ket boet gỽrthỽ+
yneb gann yr urdas. a|th ỽneuthur yn
urenhina|llaỽenhau yn uaỽr a|ỽnaeth con  ̷ ̷+
stans o|hynny. ac adaỽ rodi pob peth y
ỽrth y|gyghor o|r urenhinaeth. a|e gym+
ryt a|oruc gỽrtheyrn gỽrtheneu idaỽ o|r
uynechtit. a gỽisgaỽ brenhinaỽl dillat
ym·danaỽ a|dyuot ac ef hyt yn|llundein.