LlGC Llsgr. Peniarth 46 – tudalen 121
Brut y Brenhinoedd
121
yn enys prydein. Sef oed y|rei hynny.
llundein a chaer Euraỽc. a chaer llion
ar ỽysc. ac y|r tri dinas hynny y daryst ̷+
ygynt yr ỽyth a·r|ugeint. a guedy ran ̷+
nu enys prydein yn teir rann. y dyg ̷+
ỽydỽys yn rann archesgob caer efraỽc.
Deiuyr a brennych a|r alban megys y
keidỽ humyr. ac ỽrth archesgobaỽt lun+
dein. y doeth lloegyr a chernyỽ. ac ody ̷+
na kymry oll megys y keidỽ hauren.
ỽrth archesgobaỽt caer llion.
Guedy daruot y|r deu ỽrda gatholic
hynny llunyeithu pob peth y* wedus
o|r a berthynei ar y glan fyd gatholic
ymchuelut a wnaethant trach eu ke ̷+
uyn parth a Ruuein. a datcanu y Eleu+
terius pab pob peth o|r a wnathoydynt. a
chadarnhau a wnaeth y pab pob peth
o hynny. a guedy caffael o·nadunt y
kedernyt hỽnnỽ. yd ymchuelassant
enys prydein. a llaỽer o gedymdeith ̷+
yon dwyaỽl y·gyt ac ỽynt. a thrỽy
dysc y rei hynny yn yspeit uechan y bu
gadarn fyd y brytannyeit. a phỽy
| « p 120 | p 122 » |