Breudwd Rhyddiaith Gymraeg 1300-1425
English

LlGC Llsgr. Peniarth 45 – tudalen 36

Brut y Brenhinoedd

36

eth y erchi yn wreica idaỽ yỽ that ac y dywaỽt
ynteu y rodei ef hi idaỽ yn llawen heb argyfre+
u Can daroed idaỽ rodi y gyuoeth y gyt a|e dỽy
uerchet y lleill. A phan gigleu aganipus hynny a
thegỽch y uorỽyn Dywedut a wnaeth uot idaỽ
ef digaỽn o da a chyuoeth ac nat oed reit idaỽ ef
ỽrth dim namyn gỽreic dec dyledaỽc y caffei p+
lant o·honi yn etiued y gyuoeth ac yn diannot
y gỽnaethpỽyt eu priodas ac ym penn yspeit yng
kylch dieỽoed oes llyr y goresgynỽws y douyon y gy+
uoeth arnaỽ a|gynhalassei ef yn ỽraỽl ac y ranas+
sant yn deu haner y·rydunt ac o gymodloned y
kymyrth maglaỽn tywyssaỽc yr alban llyr at+
taỽ a deugein marchaỽc y gyt ac ef rac bot yn an+
igrif gantaỽ ac yn gewilyd uot heb uarchogy+
on y gyt ac ef ỽrth y osgord ac gwedy bot llyr y ue+
lly talym gyt a maglaỽn Sorri a wnaeth Goron+
illa y uerch yr hynaf ỽrthaỽ rac oed o uarchogy+
on y gyt ac ef yn|y llys a dywedut a wnaeth ỽrth
y gỽr uot yn digaỽn deudeng marchaỽc ar|ugein y
gyt a|e that. Ac gỽedy menegi hynny y lyr lli+
dyaỽ a wnaeth a mynet hyt at henwyn tywys+
saỽc kernyỽ y daỽ y llall a|e erbyneit a oruc ida+
ỽ yn anrydedus. Ac ny bu penn y ulỽydyn yny uu
teruysc rỽg eu gwassanaethwyr ac y sores Ra+