Breudwd Rhyddiaith Gymraeg 1300-1425
English

LlGC Llsgr. Peniarth 45 – tudalen 269

Brut y Brenhinoedd

269

A cherdet   a oruc Etwin trỽy kyuo+
eth Catwallaỽn. gan lad a llosgi. Ac gwedy
cael porth o Catwallaỽn. Keissaỽ dyuot a oruc parth
ac ynys. prydein. A phy porthua bynhac y delhei 
y bydei Etwin a|e lu yn|y ludyaỽ Canys de+
win oed y etwin. Sef oed y enỽ pelis enwir.
A hỽnnỽ a adnebydei a* redec y syr ac ar tỽrỽf
esgyll yr adar y damweineu a delhei rac llaỽ.
A hynny a uanagei ef y Etwin. Ac ỽrth hyn+
ny ny allei Catwallaỽn dyuot ynys prydein.
AC gwedy gỽybot hynny o catwallaỽn. A
thebygu na chaffei byth dyuot ynys. prydein.
yd aeth hyt ar selyf urenin. llydaỽ y geissaỽ porth
y gantaỽ megys y cai dyuot dracheuyn. Ac
yn dyuot parth|a llydaỽ. Kyuodi gwynt
kethraỽl gỽrthỽyneb a|e gwasgaru hyt
nat oed un ygyt a|e gilyd o|e llongeu. A
diruaỽr ouyn a|gymyrth llywyd llong 
y brenhin. Ac ymadaỽ ar llyỽ a oruc. Ac y
buant y·uelly ar naỽf yn kyhyt ac y bu yr
nos mal y dykei y tonneu wynt hỽnt ac
yma. A phan doeth y dyd. y doethant y ynys
uechan y|tir a|elwit Garnarei. Ac gỽedy
cael y tir Cleuychu a wnaeth y brenhin
o ỽrthrỽm heint. O trymder colli y wyr