LlGC Llsgr. Peniarth 45 – tudalen 233
Brut y Brenhinoedd
233
nerth ac na thebygei bot reit idaỽ seithuaỽ*
llu yr y ryỽ aghynuil hỽnnỽ. Ac gỽedy eu dy+
uot yn gyuagos yr lle. y gwelynt deu uy+
nyd a|thanllỽyth ar bob un o·nadunt. Ac ethry+
kyng o|r mor a oed y·rygtunt ar mynyded mal
na ellit udunt namyn ar long neu ysgraff.
Ac gỽedy cael ysgraff. Anuon bedwyr a|wna+
ethant o|r blaen y geissaỽ diheurỽyd y ỽrth
y caỽr. Ac gỽedy y dyfot partha* ar mynyd
lleihaf. y clywei gỽreigaỽl gỽynuan. Sef
a oruc ynteu megys ouynhau tebygu mae
yr caỽr oed yno. Ac eissoes galỽ y leỽder a
dispeilaỽ y cledyf a chyrchu penn y mynyd. A
phan doeth yno nyt oed namyn gỽrach ua+
ỽr yn eisted ỽrth y tanllỽyth yn ỽylaỽ uỽch
benn bed newyd cladu. Ac ual y gwelas bet+
wyr y dywaỽt ỽrthaỽ dan vylyaỽ. O tydi
direitaf o|r dynyon pa ryỽ direidi athuc ti
yr lle hỽn. Ny ellir adraỽd y gniuer poen
yssyd paraỽt it. yr aỽrhon y daỽ yr ysgym+
unedic anghynuil yr hỽn a|duc helen nith
hywel uab emyr llydaỽ yr hon a gledeis i
yr aỽrhon yn|y bed hỽn. Ac am duc inheu y
mamaeth y gyt a|hi hyt yma. Ac gỽedy
keissaỽ o·honaỽ ef kydyaỽ a hihi. Ac na|s
| « p 232 | p 234 » |