Breudwd Rhyddiaith Gymraeg 1300-1425
English

LlGC Llsgr. Peniarth 45 – tudalen 176

Brut y Brenhinoedd

176

bygu bot yn haỽs udunt goresgyn. ynys. prydein.
achos bot Emreis yn claf. Ac yna dyness+
au a wnaeth un o|r saesson a|elwit eoppa at
pasken. A|dywedut vrthaỽ yn|y wed hon. ~
Pa ueint heb ef o da a rodut ti yr neb a|lad+
ei Emreis Wledic. Ac yna y|dywaỽt pasken
Dioer heb ef Bei caffỽn i dyn a allei wneuthur
a|dywedy di. Mi a rodỽn idaỽ teir mil o pun+
hyoed aryant. Am caryat inheu tra uyhỽn
uyỽ. AC O damweinhei y mi caffel coron. ynys.
prydein. Mi a|e gỽnaỽn yn iarll kyuoethaỽc. A
hynny a cadarnhaỽn trỽy aruoll. Ac yna y
dywaỽt Eoppa vrth pasken. Miui a dysgeis
ieith y bryttanneit. Ac a ỽn y deuaỽt a|e moes
a chyuarwyd vyf yg keluydyt medeginaeth
ac vrth hynny o chywiry di y mi yr hyn yd
vyt yn|y adaỽ. Minheu a|dywedaf uym bot
yn bryttỽn ac yn uedyc da. Ac y·uelly mi a
caffa uynet y myỽn rac bron y brenhin. Ac
Odyna mi a rodaf diaỽt idaỽ. trỽy yr hon
y bo marỽ ef yn|y lle. AC ual y bo haỽs heuyt
uyg credu. Mi a eillaf uym penn am baraf
ac a dywedaf uym bot yn uanach. Ac yn gy+
uarỽyd ym pob medeginyaeth. Ac gỽedy
ymgadarnhau o·nadunt ar hynny. Sef
a wnaeth Eoppa Eillaỽ y uaraf a|e corun