Breudwd Rhyddiaith Gymraeg 1300-1425
English

LlGC Llsgr. Peniarth 45 – tudalen 130

Brut y Brenhinoedd

130

penn y|th diot o|th urenhinyaeth. Ac os da gen+
hyt ti. kyghor yỽ genhyf i anuon hyt uyg
gỽlat i y wahaỽd marchogyon etwa o  ̷+
dyno megys y bo cadarnach yn niuer ni
y ymlad a|th ely nyon ti. Ac y gyt a
hynny heuyt un  arch a archaf ui yti
pei na bei rac uyn neccau o·honi. Anuon
ti heb y Gortheyrn dy kennadeu hyt yn
germania y wahaỽd a|uynnych o·dyno
ac arch y minheu ac nyth nekeir o dim.
Ac yna estỽng y penn a wnaeth hengist a
diolỽch idaỽ. A dywedut yn|y wed hon. Ar+
glỽyd heb ef. Ti am kyuoethogesti o tir
a|dayar a da arall. Ac eissoes nyt ual y gỽe+
dei anrydedu tywyssaỽc a hanffei o lin bren+.
hined. Sef achos yỽ. Ti a|dylyut roddi y
a|e castell a|e dinas gyt ac a rodut megys
ym gwelit i yn anrydedus ym plith y ty+
wyssogyon. Ac yna yd attebaỽd Gorthe+
yrn idaỽ ef. ha ỽrda heb ef. uyg gwa+
hard i a|wnaethpỽyt na rodỽn i y ryỽ ro+
dyon hynny yti Canys estraỽn kenedyl
a phaganyeit yỽch. Ac nat atwen i etwa
ych moes chwi mal y dylyhỽyf ui ych ky+
ffelybu chwi ym kyỽdaỽtwyr Canys pei
anrydedỽn i chwi megys priaỽt gyỽdaỽt