Breudwd Rhyddiaith Gymraeg 1300-1425
English

LlGC Llsgr. Peniarth 45 – tudalen 128

Brut y Brenhinoedd

128

a hynny a uu reit in uuudhau ỽrth y kyfreith. a|fu
yr y dechreu. Ac y doetham hyt dy urenhina+
eth ti. A mercurius yn duỽ ni yn yn tywyssaỽ
a phan gigleu y brenin. kyrbỽyll mercurius
gouyn a oruc pa ryỽ gret oed gantunt. Ar+
glỽyd heb ef yn tadolyon dỽyeu yỽ saturnus a
iubpiter ar dỽyeu ereill yssyd yn llywyaỽ y
byt. Ac yn pennhaf mercurius yr hỽn a|elwir
yn yn ieith ni uogen. Ac y hỽnnỽ y parthỽys
yn ryeni y pedwarydyd o|r vythnos. Ac a al+
ỽn ni oe enỽ ef uogenes. Ac yg kymraec y
gelwir dyỽ merchyr. Ac yn nessaf idaỽ yd
anrydedỽn y dỽyes a elwir effream. Ac y hon+
no y kyssegrỽys yn ryeni y chwechet dyd o|r ỽyth+
nos. Ac yn an ieith ni y gelwir ffridei. Ac yg
kymraec duỽ gwener. Ac yna y dywaỽt 
Gortheyrn. Am aỽch kret  chwi yr
hon yssyd iaỽnach y galỽ  yn angret
noc yn kret dolurus yỽ. genhyf ui
llawen hagen yỽ genhyf aỽch dyuot Canys
reit yỽ ym ỽrthyỽch. Na duỽ ach dycco. Na pheth
arall Canys uyg gelynyon yssyd ym kywar+
sangu o bob parth. Ac o|r mynnỽch chwi trigyaỽ
ac ymlad y gyt a|mi. Mi aỽch kynhalaf ym
teyrnas yn anrydedus. Ac a rodaf  yỽch eur
ac aryant a daoed ereill a thir  a dayar