Breudwd Rhyddiaith Gymraeg 1300-1425
English

LlGC Llsgr. Peniarth 4 (Llyfr Gwyn Rhydderch, rhan 2) – tudalen 33r

Peredur

33r

129

ẏ varch. a|chan ganhat ẏ ewẏthẏr kẏch  ̷ ̷+
wẏn ẏmdeith. ac ef a doeth ẏ|goet maỽr
ac ẏn diben ẏ coet ef a|doeth ẏ|dol wastat.
a|r tu arall ẏ|r dol ẏ gỽelei gaer vaỽr
a llẏs telediỽ. a|r llẏs a gẏrchỽẏs peredur.
a|r porth a gauas ẏn agoret. a|r neuad
a gẏrchỽẏs. a|phan daỽ ẏd oed gỽr
gỽẏnllỽẏt telediỽ ẏn eisted ar ẏstlẏs
ẏ neuad a maccỽẏeit ẏn amẏl ẏn|
gẏlch. a|chyuodi a|oruc paỽb ẏn erbẏn
ẏ maccỽẏ. a bot ẏn da eu gỽẏbot ac
eu gỽassanaeth ẏn ẏ erbẏn. ar neill  ̷ ̷
laỽ ẏ|gỽrda biewed ẏ|llẏs ẏ dodet ef
ẏ eisted. ac ẏmdidan a|orugant. a
phan doeth amser mẏnet ẏ uỽẏt.
ar neill laỽ ẏ gỽrda ẏ dodet ef ẏ|eis  ̷+
ted ac ẏ uỽẏta. Gỽedẏ daruot bỽ  ̷+
ẏta ac ẏuet tra uu hẏgar ganth+
unt. gofẏn a oruc idaỽ ẏ gỽrda a
wẏdẏat llad a|chledẏf. pei kaỽn
dẏsc heb·ẏ peredur tebic oed gen  ̷ ̷+
hẏf ẏ gỽẏbẏdỽn. ẏstẏffỽl haẏarn
maỽr oed ẏn llaỽr ẏ neuad amgẏf  ̷ ̷+
fret milỽr ẏmdanaỽ. kẏmer heb
ẏ gỽr ỽrth peredur ẏ cledẏf racco
a|tharaỽ ẏr ẏstẏffỽl haẏarn. Peredur
a gẏfodes ẏ uẏnyd a|r ystẏffỽl a|tre  ̷+
wis hẏnẏ uu ẏn deu|drẏll a|r cledẏf
ẏn deu|drẏll. Dẏro ẏ drẏlleu ẏ·gẏt
a|chẏfanha ỽẏnt. ẏ drẏlleu a dodes
peredur ẏ·gyt. a chẏfannu a|oruga  ̷+
nt mal kẏnt. a|r eilweith ẏ trewis
hẏnẏ torres ẏr ẏstẏffỽl ẏn deu|drẏll
a|r cledyf ẏn deu|drẏll. ac mal kẏnt
kẏfannu a orugant. a|r trẏded ỽeith
ẏ trewis hẏnẏ torres ẏr ẏstẏffỽl

130

ẏn deu|drẏll a|r cledẏf ẏn deu|drẏll.
Dẏro ẏ·gẏt etwa a chẏfanha. peredur
a|ẏ rodes ẏ trẏded weith ẏ·gẏt. ac nẏ
chẏfannei na|r ẏstẏffỽl na|r cledẏf.
Je was heb ef dos ẏ eisted a|bendith
duỽ genhẏt. ẏn|ẏ teyrnas goreu dẏn
a lad a chledẏf ỽẏt. deuparth de deỽred
a|r gefeist. a|r traẏan ẏssẏd heb gahel.
a gỽedẏ keffẏch gỽbẏl nẏ bẏdẏ ỽrth
neb. ac ewẏthẏr itti vraỽt dẏ vam
ỽẏf inheu braỽt ẏ|r gỽr ẏ buost neith  ̷+
ỽẏr ẏn ẏ lẏs. ar neill laỽ ẏ ewẏthẏr
ẏd eistedaỽd peredur. ac ẏmdidan a|or  ̷ ̷+
ugant. ar hẏnnẏ ef a|welei deu was  ̷
ẏn dẏuot ẏ|r neuad. ac o|r neuad ẏn
mẏnet ẏ ẏstauell a gỽaẏỽ ganthunt
anuedraỽl ẏ veint. a their ffrỽt ar y hẏt
ẏn redec o|r mỽn hẏt ẏ llaỽr. a phan
welas paỽb ẏ gỽeisson ẏn dẏuot ẏn
ẏ wed honno. llefein a drẏcẏruerth
a|gẏmerth paỽb ẏndunt hẏt nat oed
haỽd ẏ neb ẏ diodef. Nẏ thorres ẏ gỽr
ar ẏ ẏmdidan a pheredur ẏr hẏnnẏ.
Nẏ dẏwaỽt ẏ|gỽr ẏ peredur beth oed hẏn+
nẏ. nẏ|s gofẏnnỽẏs ẏnteu idaỽ. Gỽe+
dẏ tewi ẏspeit vechan. ar hẏnnẏ ll+
ma dỽẏ vorỽẏn ẏn dẏuot ẏ|mẏỽn a
dẏscẏl vaỽr ẏ·rẏgthunt. a phen gỽr
ar ẏ dẏscẏl. a gỽaet ẏn amhẏl ẏgkẏlch
ẏ pen. ac ẏna diaspedein a llefein a|or+
uc paỽb hẏnẏ oed anhaỽd ẏ neb bot ẏn
vn tẏ ac ỽẏnt. Ẏn|ẏ diwed peidaỽ a hẏn+
nẏ a orugant. ac eisted tra uu amkan
ganthunt ac ẏfet. ẏn ol hẏnnẏ ẏstauell
a gẏweirỽẏt ẏ peredur ac ẏ gẏscu ẏd aeth+
ant. Tranoeth ẏ|bore peredur a gẏfodes