Breudwd Rhyddiaith Gymraeg 1300-1425
English

LlGC Llsgr. Peniarth 38 – tudalen 64r

Llyfr Blegywryd

64r

glỽys yn|y teir gỽyl arbenhic neu yn darllein llyth  ̷ ̷+
yr neu yn|y ỽneuthur rac bron y brenhin. Tri choỽyll+
aỽc llys. kerỽyn|ved. a bragaỽt. a chathyl kyn y|dang+
os y|r brenhin. Tri dyn a geidỽ breint llys yn aỽsen
brenhin. offeirat teulu. a distein. ac ygnat llys. py tu
bynhac y bỽynt ygyt; breint llys a vyd yno. Teir he  ̷ ̷+
la ryd yssyd ympop gỽlat ar tir dyn arall. hela iỽrch
a|hela kadno. a|hela dyfyrgi Tri cheỽilyd morỽyn ynt.
vn yỽ dyỽedut o|e that ỽrthi. mi a|th|rodeis vorỽyn y
ỽr. Eil yỽ pan el gyntaf y|r gỽely at y|gỽr. Trydyd yỽ
pan gyntaf o|r gỽely ymplith dynyon. dros y|kyntaf
y|telir y hamobyr. dros yr eil y|rodir y|choỽyll idi hith+
eu. O|r trydyd y dyry y|that y hegỽedi y|r gỽr. ~ ~ ~ ~
T ri argae gỽaet yssyd. gỽaet o|pen hyt gỽll. a|gỽ+
aet o gỽll hyt ỽregys. a|gỽaet o ỽregys hyt laỽr.
Os o pen y gollygir hyt laỽr; dogyn|ỽaet y|gelỽir. O|r
gỽedir y gỽaet kyntaf; o|lỽ naỽ|nyn y|gỽedir. Yr eil;
o lỽ chỽech dyn. Y trydyd; o lỽ tri dyn. Ny|byd na ~
mỽy na llei gỽerth gỽaet pop ryỽ dyn no phedeir|ar
hugeint. py gyfeir bynhac o|gnaỽt dyn y gollyger.
kyt symutter y reitheu herỽyd yr argayeu Tri|ph+
eth ny ellir eu dỽyn rac gỽreic kyt gatter am y|cham.