Breudwd Rhyddiaith Gymraeg 1300-1425
English

LlGC Llsgr. Peniarth 38 – tudalen 60v

Llyfr Blegywryd

60v

Eil yỽ dỽyn arall ar|y|phen y|r ty. Trydyd yỽ y hysp+
eilaỽ. Tri|chadarn enllip gỽreic ynt. vn yỽ gỽelet y
gỽr a|r ỽreic yn dyfot o|r vn llỽyn. vn o|pop parth id+
aỽ. Eil yỽ eu kaffel ell deu dan vn vantell. Trydyd
yỽ gỽelet y|gỽr rỽg dỽy vordỽyt y|ỽreic. Tri|chyffro
dial ynt. diaspedein karesseu. a gỽeler* elor eu kar. a
gỽelet bed eu kar heb ymdifỽyn Tri pheth a haỽl
dyn yn|lledrat ac ny|chygein lledrat yndunt. adeilat
a|diot koet. ac eredic. ~ ~ ~ ~  
T ri meib ny dylyant gyfran o tir gan eu brodyr
vn vam vn|tat. ac ỽynt. vn yỽ mab a|gaffer yn llỽyn
ac ym|perth. ac yn aneduaỽl. a gỽedy hynny ˄kymryt mam y
mab o|r gỽr o rod kenedyl. a chaffel mab arall o·honunt
ny|dyly hỽnnỽ kyfrannu tir a|r mab a|gat kyn noc ef
yn|llỽyn ac ym|perth. Eil yỽ kymryt o yscolheic ỽreic
o rod kenedyl. a|chaffel mab ohonei. ac odyna kymryt
o|r yscolheic vrdeu offerataeth. ac odyna kaffel o|r of+
feirat vab o|r vn ỽreic. ny|dyly y|mab a|gat kyn noc
ef kyfrannu tir a|hỽnnỽ. Trydyd yỽ mut. kany ro+
dir gỽlat y vut. kany dyly tir nyt atteppo drostaỽ.
Tri gỽerth kyfreith beichogi gỽreic. vn yỽ gỽaet