Breudwd Rhyddiaith Gymraeg 1300-1425
English

LlGC Llsgr. Peniarth 38 – tudalen 56v

Llyfr Blegywryd

56v

drostaỽ. ac a|ỽnel cỽbyl. ac ỽrth hynny. y|neb a|gaf+
fo gỽarant; safent ell deu ygyt ỽrth gyfrei+
th yn|y llys hyny teruyner y|dadyl oll yrydu+
nt a|r haỽlỽr. kany ellir gỽybot o neb fford
kyn barn teruynedic ae vn ohonut* a vo ky+
lus ae ell deu. ae na bo vn kylus. ac na ỽys
heuyt a vynho y|gỽarant ỽneuthur cỽbyl dr  ̷ ̷+
ostaỽ e|hun. a|thros y da kynhenus. a|thros yr
amdiffynnỽr. ae na|s mynho. ac na|ỽys heu+
yt ae gallo. ae na|s gallo. Tri|pheth a dyly
gỽarant diball eu gỽneuthur. vn yỽ atteb
yn diohir drostaỽ e|hun. a|thros y da kynhenus.
a thros amdiffynnỽr y da. Eil yỽ sefyll ỽrth gy+
freith a|barn. tros yr holl dadyl trỽy deturyt
gỽlat. Trydyd yỽ. gỽneuthur cỽbyl dros yr holl
dadyl val y barner idaỽ Ny ellir gỽarantu
vn da kyffro na digyffro a|dyccer yn erbyn
kyfreith. nac vn gỽeithret a|ỽneler yn erbyn
kyfreith os deturyt gỽlat a|e hamlyccaha. ~
Braỽtỽr hagen a|dyly gỽybot a deall trỽy
deturyt gỽlat. ae trỽy gyfreith ae yn erbyn