LlGC Llsgr. Peniarth 38 – tudalen 36v
Llyfr Blegywryd
36v
halen. y gỽr bieu y kaỽs a|r kic drychafedic. a|r lles ̷ ̷+
tri emenyn bỽlch. y ỽreic a geiff o|r blaỽt kymeint
ac a allo y|dỽyn ỽrth pen y deulin rỽg y dỽy laỽ
o|r gell hyt y ty. Pop vn a|geiff y ỽiscoed e|hunan.
eithyr y|mentyll a|rennir. O|r gat gỽr y ỽreic yn
aghyfreithaỽl. a dỽyn arall attaỽ. y|ỽreic ỽrth+
ot a|dyly trygyaỽ yn|y thy hyt ym|pen y naỽuet
dyd. ac yna o|r gollygir y|ỽrth y gỽr; pop peth o|r
eidi a dyly mynet o|e blaen o|r ty. a hitheu yn ol
y da aet o|r ty. ac yna gan dỽyn y llall; ef a dyly
rodi dilystaỽt y|r ỽreic kyntaf. kany dyly vn gỽr
dỽy ỽraged o gyfreith. P·ỽy|bynhac a atto y|ỽr ̷ ̷+
eic. ac a vo edifar gantaỽ. a|hitheu gỽedy y rodi
y ỽr arall. Os gordiỽed y gỽr kyntaf hi a|r neill
troet yn|y gỽely a|r llall y maes; y gỽr kyntaf
a|e keiff o gyfreith. O|r gỽatta gỽreic y godin+
ab; rodhet lỽ deg|ỽraged a|deugeint. ac velly
y gỽr a|e gỽatto; rodet lỽ degỽyr a|deugeint.
ac am y|tri|chadarn enllip y rodir y reitheu
hyn. O r byd y|ỽreic achaỽs dybryt a|gỽr arall.
ae o gussan. ae o ofyssyaỽ. ae o vot genthi; y
| « p 36r | p 37r » |