Breudwd Rhyddiaith Gymraeg 1300-1425
English

LlGC Llsgr. Peniarth 36A – tudalen 68v

Llyfr Blegywryd

68v

neu lyssu tyston. Tri pheth ny chygein yg
kyfreith. praỽf ar weithret eithyr tri. a gỽat
dros waessaf. a chof wedy braỽt. Tri gỽeith  ̷+
ret yssyd ar praỽf. llafur kyfreithaỽl neu
aghyfreithaỽl ar tir megys torri ffin. neu
wneuthur ffin. neu lafur arall. a gỽeithret
llỽdyn yn llad y llall yg gỽyd bugeil trefgord
tystolyaeth y bugeil yn ỽybydyat a seif
am hynny. Tystolyaeth gỽybydyeit a| seif
am tir heuyt. a gỽeithret kytleidyr lleidyr
a groccer am letrat. tystolyaeth hỽnnỽ
ar y gytleidyr a seif. Tri gỽaessaf yssyd;
ardelỽ neu warant. neu amdiffyn heb
warant. Tri chof gỽedy braỽt yssyd. go  ̷+
def o vraỽdỽr. rodi gỽystyl yn erbyn y
vraỽt. heb rodi gỽystyl yna. a gỽedy hynny
kynnic gỽystyl y gadarnhau. ny dylyir y
erbynyaỽ o gyfreith ony byd braỽt tremyc.
neu gynnic  yn erbyn braỽt gỽedy y
godef yn gyntaf. neu adaỽ ymatraỽd
yn wallus ar gyfreith a barn. a gỽedy barn
keissaỽ gỽaret y gỽall. nys dyly. Teir