Breudwd Rhyddiaith Gymraeg 1300-1425
English

LlGC Llsgr. Peniarth 35 – tudalen 69r

Llyfr Cynghawsedd

69r

Puy| bynac a| dallyo lleydyr a ledrat en| e llau
a|e ellug a|y o| gerenhyt a|y ir guerth. os adef a
guna talet seyth punt ir argluit. keny allo
talu seyth punt. kyd delyo lleydyr bot en e+
neid uadeu am lledrad keuadef. ny uarn e| kyfreith.
bot en eneid uadeu y neb a|y gellyngho. Ony di+
gaun talu seith punt der ef mal lleydyr.
Puy| bynac a| der o| uraud e kyfreith. a|y caffael
en| e wlad tros yr oit a roder idau y adau y wlad
byt eneid uadeu ony cheyf a|e pri . Cany
dele ef bot yn| y wlad en oys er argluit pye+
yfo y maes y dyt hỽnnỽ onyt gan degemot
ac ef. Puy benac y caffer lledrat en y ty can+
ỽod ke nhet yndau kyd yduo idau ef a| gat+
wo y corf ef rac e| lledrat. euo eyssoes bieu
cadu y ty rac lledrat. Puy| benac y caffer
ol lledrat en dyuot o|y ty. ac na allo e he+
brug e ỽrthau. byt anreith odef. Ony bit
anreyth idau dier. ac urth henne e
barn e kyfreith y ty en halauc ty ac ef ac a uo
gyt ac ef. eythyr adneu o bit en| e ty. Cany
perchenauc adneu cadu y ty rac ledrat
urth henne ny byt colledic ef o|r eidau
Nyt oes y kyfreith lle deleer anreyth grybdeil o+
nyt en ỽn lle am geleyn. Puy| bynac a ỽy+
no gueuthur dogyn ỽanac aet ar raglau