Breudwd Rhyddiaith Gymraeg 1300-1425
English

LlGC Llsgr. Peniarth 32 (Y Llyfr Teg) – tudalen 29

Llyfr Iorwerth

29

idaỽ y esgynnu arnaỽ. Ynteu bieu barnu idaỽ
ynteu y vreint a|e dylyet yn rat. ereiỻ a|dyweit
mae y pengỽastraỽt a|dyly hynny. Y naỽd yỽ
o|r pan dechreuo y gof ỻys gỽneuthur pedeir
pedol ac eu to o hoelyon. a phedoli march y brenhin.
dỽyn y dyn a|wnel y cam. Y sarhaet yỽ chỽe|bu
a chỽeugeint aryant. Y werth yỽ chỽe|bu a|chỽe+
E R eil yỽ y troedaỽc. Ef a|dyly y [ ugein mu.
dir yn ryd. a|e varch a|e wisc megys y ỻeiỻ.
a|r sỽyd honno a|daỽ idaỽ o vreint y dir. Ef a
dyly daly traet y brenhin. yn|y arfet o|r pan|dechr+
euho eisted yn|y gyuedach yny el y gysgu. ac a
dyly cossi y brenhinac yn gyhyt a hynny o amser
ef a|dyly gỽylyaỽ y brenhin. rac pob gỽaỻ. Y naỽd
yỽ o|r pan dotto y brenhin y draet yn|y arffet ef;
yny el o|e ystaueỻ. Ef a dyly bỽyta am vn dys+
gyl a|r brenhin. a|e geuyn ar y tan. Y sarhaet a|e
werth megys y gỽastraỽt auỽyn. 
T Rydyd yỽ maer|bissweil. Ef a dyly gỽarch+
adỽ y ỻys gỽedy yr ystiwart ỻys. yn ben+
naf. ac a dyly kymryt attaỽ a|rodho y maer
a|r righyỻ o da y daly y ỻys. Ef a dyly peri yr
ar a|r eredic a hoỻ gyfreideu y ỻys. Ef a|dyly
dirỽy a chamlỽrỽ y vaerdref. ac a|dyly ebediỽ
gỽyr y vaerdref. a|e wreic amobyr eu merchet.
Yny bo dadleu y·rỽg deuwr o wyr y uaerdref