LlGC Llsgr. Peniarth 32 (Y Llyfr Teg) – tudalen 185
Llyfr Iorwerth
185
daly yg|kymhỽt araỻ; anuonher y|ỽ gymhỽt e
hun y ymdinỽyn am y cam a|wnel. O deruyd. y dyn gỽ+
neuthur cam yg|kymhỽt ny hanffo o·honaỽ;
ymdiwyget yno ar|dyn ry wnel y cam idaỽ. ac ̷
o|r|delir yno; bit y dirỽy a|e gamlỽrỽ o|e raclaỽ e
hun. O|deruyd. y dyn wneuthur cam yg|kymhỽt ny
hanffo o·honaỽ. ac ynteu yn anỻỽythaỽc ac
a|e|da yno. os yno y delir; bit y dirỽy a|e gamlỽrỽ
y raclaỽ y kymhỽt hỽnnỽ O|deruyd. y dyn wneuthur.
cam yg|kymhỽt ny hanffo ohonaỽ. a|e daly yg
kymhỽt ny hanffo ohonaỽ; anuonher y|r kym+
hỽt yd hanffo o·honaỽ y wneuthur iaỽn am
y cam. yr hynn a|dywedassam ni uchot yssyd
iaỽn o byd vn arglỽydiaeth y dynyon. O|deruyd.
y dyn wneuthur cam o arglỽydiaeth yn|araỻ;
diwyget yn|yr honn y gỽnel. O|deruyd bot dyn yn
anỻỽythaỽc yg|gwlat araỻ dyeithyr yr honn yd
hanffo o·honei. a cheissaỽ o·honaỽ breint y
wlat e|hun yn honno; ny|s|dyly. kanys iaỽn+
ach yỽ diua breint vn dyn. no breint y wlat.
O|deruyd. bot ymrysson am ynyssed y|myỽn dỽfyr
ac na bo kynwarchadỽ arnadunt; gatter y|r
neb nessaf y bo y tir udunt. ac os|kyn nesset
vyd y tir udunt; eu rannu. os kynwarchadỽ
a vyd; eu gadu y|r neb a|e kynwarchatwo. Ryd
vyd y baỽp hely y mor. a vỽryo y mor hagen
| « p 184 | p 186 » |