LlGC Llsgr. Peniarth 32 (Y Llyfr Teg) – tudalen 169
Llyfr Iorwerth
169
onadunt; herỽyd breint y tir yd hanffont o+
honaỽ y|dylyant y dalu. ac ny thal mab dros
y dat y kyfryỽ hỽnnỽ. O|r byd gỽr a deu ar+
glỽyd idaỽ. a|thir idaỽ dan bop vn onadunt;
ef a|dyly talu ebediỽ y bop vn onadunt. O|r
byd y ỽr deu dir y·dan vn arglỽyd; talet y ebe+
diỽ o|r tir mỽyaf y vreint o·honaỽ. O deruyd. y gerd+
etwr aỻtut. cleuychu ar y ford a|e varỽ. talet
pedeir ar|hugeint yn|y ebediỽ y berchennaỽc
y|tir y bo marỽ arnaỽ. a|e da namyn hynny
y|r brenhin. Os gỽreic vyd; vn ar|bymthec a dal.
Amobreu merchet y gỽyr a dywetpỽyt uchot.
kymeint vydant ac ebediweu eu tadeu. Ny
thal gỽreic namyn vn amobyr o gyfreith.
a hỽnnỽ herỽyd breint y tir yd hanffo o·honaỽ.
ac ny|dyly neb y dalu drosti o·nit hi e|hun. o+
ny|deruyd y rodi ae o|e that ae o|e brodyr. ac* o|e
chenedyl. ac na chymeront vach ar y hamo+
byr y rodyat a dyly y dalu. Pỽy|bynnac a
dreisso gỽreic; talet y hamobyr. Sef achaỽs
na thal gỽreic namyn un amobyr vyth. ỽrth
nac ymchoel vyth ỽrth vreint arglỽyd y tir
hỽnnỽ. nac ỽrth vreint y chenedyl. namyn
ỽrth vreint y gỽr y|del idaỽ. Teir gỽraged
ny dylyir amobyr udunt. Merch etlig. a
merch penteulu. a merch brenhin. Sef achaỽs
yỽ;
| « p 168 | p 170 » |