Breudwd Rhyddiaith Gymraeg 1300-1425
English

LlGC Llsgr. Peniarth 32 (Y Llyfr Teg) – tudalen 137

Llyfr Iorwerth

137

Os kỽbyl a baỻa; dec ar|hugeint a delir a|hynny
bob blỽydyn tra uo byỽ. ar nyt ardho. a|e broui
ynteu bob blỽydyn. ac os o|r neiỻtu yd ard; talet
pymthec. ac ueỻy bop blỽydyn. ỻoscỽrn ỻo y
vlỽydyn y ganer; keinhaỽc a|dal. Yr eil vlỽydyn;
dỽy geinhaỽc. Y dryded vlỽydyn; teir keinhaỽc.
Y bedwared; pedeir keinhaỽc. ac veỻy y tric. Pỽy
bynnaa wertho dinawet; Jaỽn yỽ idaỽ y oruot
arnaỽ rac tri heint y gỽarthec. ac yn ragor rac
y clafri. hyt wyl badric. a|r neb a brynho dinaỽ+
et; a|dyly y gadỽ yn ỻe iach. ac y myỽn ty ny ry
vo clafri seith mlyned gynt yndaỽ. 
G ỽerth porcheỻ o|r nos y ganer hyt pan el
yny donuỽy; keinhaỽc kyfreithHyt tra vo yn
dynu; dỽy geinhaỽc kyfreithSef yỽ hynny; tri mis.
ac o hynny yny el y moch y|r coet; banỽ vyd.
a phedeir keinhaỽc vyd y werth. ac o wyl Jeuan
hyt galan; pymthec. O|r kalan hyt wyl Jeuan
elchỽyl; chwech cheinaỽc. Ac yna yd|a y|r coet
ual y vam. a|dec ar|hugeint vyd y werth. Teithi
hỽch yỽ; na bo baed redaỽc. ac nat ysso y pher+
chyỻ. a|e goruot tri·dieu a|theirnos rac y
vyny·glaỽc. neu ot ys y pherchyỻ. neu o|r byd
baed redaỽc; atuerer traean y gỽerth. herwyd
ereiỻ y hanhergỽerth. kanys kymeint yỽ gỽ  ̷+
erth y hael; a gỽerth teir o|r moch.