Breudwd Rhyddiaith Gymraeg 1300-1425
English

LlGC Llsgr. Peniarth 32 (Y Llyfr Teg) – tudalen 104

Llyfr Iorwerth

104

a|a ymreint. Ny dylyir talu ebediỽ mab yny
vo pedeir blỽyd ar|dec. ac yna y mae iaỽn y|r
tat dỽyn y vab ar yr arglỽyd a|e orchymyn
idaỽ. ac yna y|dyly ynteu gỽrhau o|e arglỽyd.
a|bot ỽrth vreint y arglỽyd. ac ef e|hun a
dyly atteb drostaỽ o bop haỽl o|r a ouynher
idaỽ. ac ef e|hun a dyly medu y da. ac ny dy  ̷+
ly y dat y vaedu o hynny aỻan mỽy noc es+
traỽn. ac os maed gan gỽynaỽ o|r mab rac+
daỽ; ef a vyd dirỽyaỽc. ac a wna iaỽn y|r mab
o|e sarhaet O|r byd marỽ mab o|e bedeir blỽ+
yd ar|dec aỻan; ac na bo etiued idaỽ. yr arglỽ+
yd bieiuyd y|da yn gỽbyl. ac a|dyly bot yn|ỻe
mab idaỽ. a marỽ·dy vyd y ty. Ereiỻ a|dyw+
eit na byd marỽ·dy o vn; namyn o dyn a vo
marỽ o agheu deissyuyt heb etiued idaỽ. ac
heb gaffel kymynnu yr eidaỽ. ac o|r oet hỽnnỽ
aỻan y byd vn vreint a bonhedic canhỽynaỽl.
kan·nyt oes vreint idaỽ namyn y vonhed. ac
nat esgyn ynteu ar vreint y dat yny vo marỽ
y dat. ac na byd marchaỽc neb yny esgynho.
Gỽerth bonhedic canhỽynaỽl; yỽ teir bu a
thrugein mu. Y sarhaet yỽ; teir|bu a thri uge+
int o aryant. Os gỽr ar deulu vyd ynteu; pe+
deir|bu a phedwar ugein|mu vyd y werth. Y|sar+
haet yỽ pedeir|bu a phedwar ugeint aryant.