Breudwd Rhyddiaith Gymraeg 1300-1425
English

LlGC Llsgr. Peniarth 31 – tudalen 4v

Llyfr Blegywryd

4v

hebrỽng y dyn hyt yr eglỽys nessaf. Naỽd y
bard teulu yỽ hebrỽng y dyn at y pen teulu.
Naỽd y gostegỽr yỽ; o|r ostec kyntaf a dotto yn|y
neuad; hyt y diwethaf. Naỽd dryssaỽr neuad
yỽ; hebrỽng y dyn hyt y vreich a|e wialen par+
th ar porth kanys ef a|e herbyn. Naỽd y porth+
aỽr yỽ kadỽ y dyn y roder naỽd idaỽ hyt pan
del y pen teulu trỽy y porth parth a|e lety. A|e ell+
ỽng gyt ac ef y gymryt naỽd hyt pan a·daỽho y
dyn diwethaf y llys. Naỽd dryssaỽr ystauell yỽ;
hebrỽng y dyn at y porthaỽr. Naỽd morỽyn ysta+
uell yỽ kymeint a naỽd gwas ystauell y brenhin.
Naỽd gwastraỽt afỽyn yỽ tra wnel y gof llys pe+
deir pedol ac eu to o hoylon. a thra pedolo amỽs y bren+
hin. Naỽd y canhỽyllyd yỽ o|r pan enynher y
ganhỽyll gyntaf hyt pan diffoder y diwethaf.
Naỽd y trullyat yỽ o|r pan dechreuer gwallaỽ
y gerỽyn gyntaf hyt pan darffo y diwethaf.
Naỽd y medyd yỽ o|r pan dechreuho parotoi y ge+
rỽyn ved; hyt pan darffo y chudyaỽ. Naỽd sỽy+
dỽr llys yỽ o|r pan dechreuho rannu y bỽyt; hyt
pan gaffo y diwethaf y uỽyt. Naỽd y coc yỽ o|r
pan dechreuho troi y golỽyth kyntaf hyt pan tor+
rer y diwethaf gyr bron y brenhin ar vrenhines.