Breudwd Rhyddiaith Gymraeg 1300-1425
English

LlGC Llsgr. Peniarth 31 – tudalen 18r

Llyfr Blegywryd

18r

ac ny chyll guerth y tauot. Vn yỽ pan difa+
rno kyfryỽ ac a uarnassei gynt. trỽy gyffel+
ybyon achỽysson. Eil yỽ pan el ar gyueilorn
yn datganu dadyl. o|r kadarnha mỽy neu lei
yn|y dadyl noc a uo o eireu grym. Trydyd yỽ
na rodho gỽystyl gyt a|e varn pan rodher gỽ+
ystyl arall yn|y erbyn. o|r mod kyntaf y varn
gyntaf a dileir. O|r eil datgan a iaỽnheir. O|r
trydyd. y uarn heuyt a dileir yna kyt bo·et ia+
ỽn. kanys cadarnhaỽys y braỽdỽr hi yn am+
seraỽl trỽy ỽystyl. Os datleuỽr a|ebryuycca
ym·ỽystlaỽ a braỽdỽr; nyt amgen pan y dat+
kano gyntaf idaỽ; ny cheiff ymỽystlaỽ ac ef
am y varn honno byth guedy hynny. kyn bo+
et cam y varn. Yn gyffelyb y hynny ot ymỽ+
ystla ef yn am·seraỽl ac nat ymỽystlo y braỽ+
dỽr ac ef. y varn a dygỽyd.
HYt yma y dywespỽyt o sỽydocyon llys
y brenhin ac eu kyfreitheu. Rac llaỽ y
dywedir o sỽydocyon kyffredin yssyd rỽng yr
arglỽyd a gwyr y wlat. Pump sỽydaỽc a osso+
des y brenhin ym pop llys o|r wlat y gỽyned.
a phowys. nyt amgen. Maer. kyghellaỽr.
Rigyll. Effeirat y ysgriuennu datleuoed. Ac