Breudwd Rhyddiaith Gymraeg 1300-1425
English

LlGC Llsgr. Peniarth 31 – tudalen 10v

Llyfr Blegywryd

10v

rysson rỽng haỽlỽr ac amdiffynnỽr am y varn a rodet
udunt. Ac yna y may y doosparth ar y braỽdỽr a|e
rodassei. Eil yỽ bot amrysson rỽng haỽlỽr a braỽt+
ỽr ac ym·ỽystlaỽ am y varn. Trydyd yỽ bot ymỽys+
tlaỽ rỽng amdiffynnỽr a braỽdỽr am y vraỽt. Ac am
y deu ymỽystlaỽ hynny yt uyd y dosparth ar aỽdur+
daỽt llythyraỽl. kanys diledyf gyfredin uyd yr aỽ+
durdaỽt. Sef yỽ hynny braỽtlyfyr.
PEn guastraỽt a geiff y gan y distein y gayaf cro+
en ych. a chroen buch yr haf y wneuthur ke+
bystreu y veirch y brenhin. A hynny kyn rannu y
crỽyn rỽng y distein ar sỽydocyon. Ef a geiff coysseu
y gwarthec a ladher yn|y gegin. O aryant y guast+
rotyon y keiff ran deu ỽr. Hen gyfrỽy a hen ffrỽyn
amỽs y brenhin a geiff. Pen guastraỽt ar guastrot+
yon a gaffant yr ebolyon gwyllt oll a del yr bren+
hin o trayan anreith. Ancỽyn a geiff; nyt amgen
seic. Ef a dyly ystynnu pop march a rotho y brenhin.
Ac o pop march y keiff ef pedeir keinaỽc. eithyr o tri
meirch. y march a roder yr effeirat teulu. Ar hỽn
a rodher yr braỽdỽr llys. ar vn a rodher yr croyssan+
nyeit. kanys rỽymaỽ troyt kebystyr hỽnnỽ a|ỽne+
ir ỽrth y dỽy geill. Ac uelly y rodir. ynteu a|dyly
rodi gan pop march kebystyr. Ef a dyly dỽyn yr