LlGC Llsgr. Peniarth 190 – tudalen 88
Ystoria Lucidar
88
byt a|gytsynnyaỽd am angheu crist. ac am
hynny y dywedir. Ef a|daỽ hynn oỻ o drygoed
ar y genedyl honn. discipulus Os crist yssyd wir dru+
garaỽc. a|e drugared dros y hoỻ weithredoed.
ac ynteu gỽedy dyuot y alỽ pechaduryeit
ac nyt y rei gỽirion. paham na thrugarha+
aỽd ynteu ỽrthunt ỽy. Magister Trugaraỽc yỽ duỽ
ỽrth y rei a|adnapont eu bot yn|druein. y rei
enwir a|debygant eu bot yn wirion. ac ỽrth
hynny ny eilỽ yr arglỽyd ỽynt. megys y dyỽ+
edir. Ny thrugarhey di arglỽyd ỽrth baỽp o|r
a|wnel enwired. a|chanys ynteu yssyd drugar+
aỽc a|chyfyaỽn. os efo a|drugarhaei ỽrth aelo+
deu diaỽl anghyfyaỽn vydei. ỽrth hynny. tru+
gared a vyd y|r rei gỽirion. a|thrugaraỽc yỽ
ynteu ỽrth y hoỻ weithredoed. y gỽr a|dyw+
ynna yr heul ar wirion ac enwir. ac a|dyry
glaỽ udunt ac a|e pyrth. discipulus A|oes arỽydon y
gaỻer adnabot gỽahan y·rỽng y rei da a|r
rei drỽc. Magister Oes. y rei gỽirion a|vyd da eu
kytwybot o|e gobeith. ac ỽynebeu hygar udunt.
| « p 87 | p 89 » |