Breudwd Rhyddiaith Gymraeg 1300-1425
English

LlGC Llsgr. Peniarth 190 – tudalen 260

Penityas

260

rendeu ar o·ganu. ac na|s amheuo. herỽyd y
gorchymyn hỽnn. O|r pecha dy vraỽt y|th
erbyn. keryd ef y·rot ac ef. Yn|y geneueu
y pechant y rei glỽth pan vỽytaont neu pan
yfont ormod. Yn eu harogleu y kodant duỽ
y rei a digrifhaant yn adurn putein·yaỽl.
ac a|wnant udunt arogleuedigaeth. Y|r rei
hynny y byd drewyant yn ỻe eu hynaỽs
arogleu. Megys y dyweit ẏsais broffỽyt.
Y vlas a|r arogleu a bechant o|r yspisri a|r
ỻysseuoed. O|e eneu y pecha dyn o vỽyt a
chussaneu. a|geiryeu. ym mỽyt a|diawt o
yfet gormod. neu o vỽyta. O gussaneu me+
gys y gwna y wiber. neu o vedỽl godinabus.
O|r geireu yn amyl. o|r byd segur neu drỽy
wattwar. neu oganu. neu ymanhyed. neu
vocsachu. neu ymgeinyaỽ. neu ymeỻdigaỽ.
neu dyngu annvdon. O|e laỽ y pecha dyn.
o roi y gret yn|drỽc. neu o dreissaỽ neu o
ledratta. neu o|deimlaỽ peth gỽahardedic.
neu o daraỽ. O|e draet y pecha dyn. pan gerdo