LlGC Llsgr. Peniarth 190 – tudalen 213
Ymborth yr Enaid
213
am|brif degỽch y carueiduab dwywaỽl a
dywetpỽyt uchot. a thebic y vot y·rỽng
dy vreicheu. a|thitheu y·rỽng y vreicheu
ynteu yn ymwasgu ac yn ymgaru ac
ef gan gadarn gredu ac ymdiret yn hyn+
ny. ac yna drỽy y|wediaỽ ef. galỽ yn ga+
redic ar yr yspryt glan. gan dywedut yr
emyn hỽnn o|r yspryt glan. gan garo+
li neu hopyaỽ dy gaỻon idaỽ o|e hoỻ
ewyỻys serchaỽl garyat. ~ ~ ~ ~ ~
D yret yspryt sant creaỽdyr byt. bydo+
ed eurnaf. Y|n caỻonneu. a|n|dỽy+
vronneu. vreinyaỽl hynaf. Gofỽy an|bryt
tro yn kyngyt. keingadyr waessaf. ỻaỽna
o|th rat. ni a|th garyat. gỽraỽl adaf. Ti
yỽ|n kadyrdỽr. a|n didanỽr. y didanaf. ffyn+
naỽn vyỽ·rat. rod douyd dat. o dut uch+
af. Tan anỽylyt. serch a gleindyt. glan
demyl euraf. Oes duỽ|r deheu. doethon
eiryeu. eiryan wanaf. Seith·dyblyc rod
o seith ryỽ vod. vud nefolaf. a ryd yn|haỽd.
| « p 212 | p 214 » |