Breudwd Rhyddiaith Gymraeg 1300-1425
English

LlGC Llsgr. Peniarth 190 – tudalen 163

Ystoria Lucidar

163

newyd a|phob creadur. am weỻygyaỽ
gỽeỻau eu hansaỽd tra|e|gaỻassant. a
chas y|r hoỻ seint am lesteiryaỽ udunt
ỽynteu eu ỻewenyd tra|e gaỻassant
Ryued yỽ eu gỽrthwyneb megys na
eỻir medylyaỽ na chredu meint ỻew+
enyd y rei. veỻy ny eỻir kyffelybu na
thraethu meint poeneu y rei ereiỻ.
ac am hynny y gelwir ỽynt yn gyuyr+
goỻedigyon. am eu dygỽydaỽ y ỽrth
vuched duỽ. discipulus Ny dyaỻaf|i hynny. Magister
Pan adeilyaỽd yr arglỽyd duỽ neu+
ad vrenhinaỽl idaỽ. y ỻithraỽd y pa+
ret pan|dygỽydaỽd yr|engylyon. a
phan vynnaỽd y gyweiryaỽ yd anuo+
nes y vab y gynnuỻ y mein byỽ y|r
adeilyat hỽnnỽ. ac esgynnu yn|y ger+
byt a|wnaeth ef. a dwyn y myỽn attaỽ
lawer o vein. ac adaỽ y rei a|dygỽyd+
aỽd. Y kerbyt weithyon yỽ y pedwar
angel·ystor. a|r ebystyl ynt y mein a
dynnassant yndaỽ y grist oc eu pre+
geth