Breudwd Rhyddiaith Gymraeg 1300-1425
English

LlGC Llsgr. Peniarth 19 – tudalen 41r

Brut y Brenhinoedd

41r

165

a|oed ossodedic yr y dechreu. a|gos+
sot ereiỻ o newyd. a rodi rodyon
maỽr ehalaeth y|r a|e harchei. ac
veỻy yd ehedaỽd y glot ef dros
deruyneu europpa. ac y·gyt a
hynny y ofyn a|e garu oed ar
wyr ruuein. a mỽy a|dywedit am+
danaỽ e|hun yn ruuein noc am
vrenhined hoỻ deyrnassoed y byt.
a hynny a dywaỽt Juuenal ỽrth
nero amheraỽdyr ruuein pan
y coffaaỽd yn|y lyuyr ef. Ti a gef+
fy heb ef vrenhin creulaỽn ka+
darn y|th erbyn o ynys brydein.
a heb petruster. gweiryd adarwen+
idaỽc oed hỽnnỽ. Nyt oed yn ym+
lad gỽr gadarnach noc ef. nac
ar hedỽch gỽr arafach noc ef.
Nyt oed vn digrifach. nyt oed yn
rodi da gỽr haelach. A gỽedy ter+
uynu y vuched a|e varỽ y cladỽ+
yt yg|kaer loeỽ y|myỽn temyl a|w+
nathoed e|hun yn enryded y loeỽ
amheraỽdyr ruuein. 
A  Gỽedy marỽ gweiryd y
doeth meuric y vab ynteu
yn vrenhin. Gỽr enryued y bru+
der a|e doethineb oed hỽnnỽ. Ac
ympenn yspeit gỽedy y vot yn
gwledychu y doeth rodri bren+
hin y fichteit o sithia. a|ỻyghes
uaỽr ganthaỽ y|r alban y|r tir. a
dechreu anreithaỽ y gỽladoed
hynny. A dyuot a|oruc meuric
yn|y erbyn a chynnuỻeitua uaỽr

166

ganthaỽ. ac ymlad ac ef a|e|lad.
A gỽedy kaffel o veuric y vudu+
golyaeth honno. drychafel ma+
en maỽr a|wnaeth yn arỽyd   
kaffel o·honaỽ hynny yn|y wlat
a|elwit o|e enỽ ef westymerSef
yỽ hynny yg|kymraec. gỽys
veuric. Ac yn|y maen hỽnnỽ
yd ysgriuennỽyt gỽeithredoed
meuric ỽrth gadỽ cof vyth.
A  Gỽedy ỻad rodri y rodes
meuric rann o|r alban
y|r bobyl orchyuedic*. a dathoed+
ynt gyt a rodri y bressỽylaỽ
yndi. a|r wlat a rodes ef udunt
ỽy a elwit katneis. a|r wlat
honno diffeith oed yna heb neb
yn|y chyuanhedu. a gỽedy nat
oed wraged udunt. Sef a|wna+
ethant erchi y|r brytanyeit eu
merchet a|e karesseu yn wra+
ged udunt. ac eu nackau a|w+
naethpỽyt udunt. kannyt
oed deilỽg ganthunt rodi eu
merchet na|e karesseu udunt.
Sef a|wnaethant ỽynteu my+
net hyt yn Jwerdon. ac odyno
dỽyn gỽraged udunt. ac o|r rei
hynny kynnydu plant ac e+
tiuedyon. ac amylhau pobyl.
a|r bobyl honno yỽ y gỽydyl
fichti. a ỻyma megys y doeth+
ant. ac y kynhỽyssỽyt yn
gyntaf yn|yr ynys honn. ac
yr hynny hyt hediỽ y maent