Breudwd Rhyddiaith Gymraeg 1300-1425
English

LlGC Llsgr. Peniarth 19 – tudalen 21v

Brut y Brenhinoedd

21v

83

uodi a|wnaeth vn ohonunt y
vyny. Sef oed y enỽ membyr
a|dywedut bot yn oreu kyghor
udunt. ac yn iachaf. kymryt
kennat y vynet ymeith o|r
mynnynt iechyt udunt ac
y hetiuedyon gỽedy ỽynt. kan+
ys o|r rydheynt ỽy y brenhin
a chymryt rann o|e gyuoeth
ganthaỽ y bressỽylaỽ yndi ym+
plith gwyr groec. ef a|debygei
na cheffit tragywyd hedỽch
yn eu plith o|r dyd hỽnnỽ aỻ+
an. kanys wyron a|gorỽyron
y rei ỻadedigyon a|goffeynt
eu gelynyaeth ac ỽynt yn dra+
gywydaỽl. ac a|e hetiuedyon
ỽynteu. ac o|r darffei bot brỽy+
dyr y·rygthunt. niuer groec
peunyd a amylhaei. a niuer
tro a leihaei. Ac ỽrth hynny
y kyghorei ef kymryt y verch
hynaf y bandrasus yr honn
a elwit Jgnogen yn wreic y
eu tywyssaỽc. a ỻogeu a phob
ryỽ beth o|r a vei reit udunt
ỽrth eu hynt. ac os hynny a
geffit. kymryt kennat y vy+
net y le y geỻynt kaffel tra+
gywydaỽl hedỽch. 
A  Gỽedy daruot y vembyr
teruynu yr ymadraỽd
hỽnnỽ ufudhau a|wnaeth yr
hoỻ gynnuỻeitua y gyghor
ef. a dỽyn pandrasus y ganaỽl.

84

y gynnulleitua a wnaethpỽyt a
dywedut idaỽ y dihenydyit yn
diannot ony wnelei yr hynn yr
oedynt ỽy yn|y orchymyn idaỽ.
A thra yttoedit yn dywedut ỽrth+
aỽ yr ymadraỽd hỽnnỽ. yd oed
ynteu y myỽn kadeir oruchel
ual y dylyei vrenhin. a gỽedy gỽ+
elet o·honaỽ gogyfadaỽ y ageu
atteb a|oruc yn|y wed honn. ka  ̷+
nys tyghetuen a|m rodes i yn
aỽch medyant chỽi dir yỽ ymi
wneuthur aỽch mynnu chỽi rac
coỻi vy muched. yr honn nyt oes
gỽerthuaỽrogach na digrifach no hi
yn|y byt herỽyd y gỽelir ymi. Ac
ỽrth hynny nyt ryued y phry+
nu o bop ford o|r y gaỻer y chaf+
fel. a chyt boet gỽrthỽyneb gen+
nyf|i rodi vy merch. eissyoes di+
dan yỽ gennyf y rodi y|r gỽas
jeuangk hỽnn a|henyỽ o etiued
priaf vrenhin tro. ac anchises
a|r boned yssyd yndaỽ ynteu yn
blodeuaỽ mal y geỻir y welet yn
eglur. A phỽy a aỻei oỻỽng ke+
nedyl tro hediỽ yn ryd yr honn
ry vuassei y saỽl vil o vlỽynyded
ac amseroed y·dan vrenhined
groec yg|keithiwet. Pỽy a|geis+
syei lauuryaỽ ygyt ac ỽyntỽy
y geissyaỽ rydit o|r ryỽ geithiỽ+
et honno. A chan gaỻaỽd y gỽas
ieuangk hỽnn hynny. minneu
a rodaf vy merch idaỽ ef yn ỻaỽ+
en