Breudwd Rhyddiaith Gymraeg 1300-1425
English

LlGC Llsgr. Peniarth 18 – tudalen 66r

Brut y Tywysogion

66r

ỽyr y|fredic amheraỽdyr. A|mamffret map ffredic y|my+
ỽn y|vrỽydyr ar vaes yn|y pỽyl. Yn|y|vlỽydyn honno y
darestygaỽd sỽdan babilon dinas antiochia gỽedy
llad y|gỽyr ar gỽraged a diffeithaỽ gỽlat armenia
ac eu dỽyn yg|kethiỽet. Yn|y vlỽydyn racỽynep y|bu
varỽ goronỽ ap ednyuet. a ioap abat ystrat|flur.
Y|vlỽydyn racỽynep ymis racuyr y|bu varỽ grufud ap
grufud madoc arglỽyd maelaỽr. A madaỽc vychan y
vraỽt. Ac y cladỽyt yn llynn egỽestyl.
DEg|mlyned a|thrugeint a|deu|cant a mil oed
oet crist. pann vu marỽ meredud ap grufud
arglỽyd hiruryn trannoeth o duỽ gỽyl luc
ỽyry yg|kastell llann ymdyfri. Ac y|cladỽyt yg|kabi+
dyldy y|myneich yn ystrat|flur. Y|ulỽydyn honno.
y|goresgynnaỽd llywelyn ap grufud castell caerfili. Y|ulỽydynn
honno y|bu varỽ leỽys vrenhin ffreinc a|e vap.
A legat y|pab ygyt ac ef ar y fford yn mynet y|ga+
erusalem. ar loỽys hỽnnỽ yssyd sant enrydedus
yn|y nef. Yn|y vlỽydyn racỽyneb y|hỽechettyd ỽedy
aỽst y|bu varỽ maredud ap rys gryc yn|y gastell
yn|y dryslỽyn. Ac y|cladỽyt yn|y ty gỽynn rac bronn
yr allaỽr vaỽr. Ym|penn y|teir ỽythnos ỽedy hynny
y bu varỽ rys Jeuanc ap rys mechyll. yg|kastell
dinefỽr. Ac y|cladỽyt yn tal y llecheu. Yn|y ulỽydyn
racỽynep y|bu varỽ henri vrenhin dyỽ gỽyl cicilie
ỽyry. gỽedy ỽledychu ỽythnos a|mis ac vn vlỽydyn