LlGC Llsgr. Peniarth 18 – tudalen 60v
Brut y Tywysogion
60v
Abat ystrat|flur heddỽch a|henri vrenhin am|dyly+
et a|dylyit yr vynnachloc yr ys hir o amser kynn
o hynny. gann vaddeu yr abat ar cofent deg|morc
a|deugein morc. a|thrychan morc. A|thalu y|gymeint
arall myỽn teruynev gossodedic herỽyd val y ke+
ffir yn|yr annyales y|vanachloc. Y ulỽydyn honno
y cauas yỽein ap rotpert gedeỽein y|dylyet. Ac y
cauas rys vychan ap rys mechyll castell carec
kennenn dracheuen. a roddassei ieuan yn dỽyllo+
drus ymedyant y|ffreinc o gas ar|y|map. Y
ulỽydyn honno y|kennhadaỽd henri vrenhin
y abat ystrat|flur. Ac y abat aber conỽy gorff grufud
ap llywelyn. Ac y|ducant gantunt y aber conỽy ynn|y
lle y|mae yn gorỽed. Y ulỽydyn racỽyneb y daeth
leỽys vrenhin ffreinc a|e tri broder ar vrenhines
hyt dinas damieta. Ac y|rodes duỽ idaỽ y|dinas
yn rỽyd ỽedy adaỽ o|r saracinyeit. Yr haf racỽyn+
neb yd|ymhoelaỽd y|teghetuen yn|y gỽrthỽynep
Ac y|delit y brenhin y|gann y saracinyeit. ỽedy
llad rotpert y|vraỽt ac amgylch deg|mil ar|huge+
int o|gristonogyon. A|thros y ellygdaỽt ef a|e|he+
brygyat ef a|e ỽyr hyt yn acrys y goruu arnaỽ
rodi damietam dracheuen yr saracinyeit. A
diruaỽr sỽmp o aryant ygyt a|hynny. Ac ych+
ydic ỽedy hynny y|rodes duỽ idaỽ uudygolya+
eth y|dial ar elynyon crist y sarahet. kanys
| « p 60r | p 61r » |