Breudwd Rhyddiaith Gymraeg 1300-1425
English

LlGC Llsgr. Peniarth 18 – tudalen 55v

Brut y Tywysogion

55v

y attep ger y|bronn y|tyỽyssaỽc ỽyntỽy. Ac y|ỽneuthur yaỽn
am a|ỽnaethoed. Ac y gymryt yaỽn y|gann y|tyỽ
yssaỽc am bop cam o|r a|ỽnaethoed idaỽ. Ar y|iarll
a vuudhaaỽd yr gorchymun a|morỽydaỽ a|oruc
y|myỽn llog hyt yn lloegyr gyt ac ychydic o
niuer. Ac adaỽ y|lu yg|kilgerrann y|gynhal y
gỽeith dechreuedic. Ac y|nerthav y|lle y|gellynt
perigyl. Ac ymdangos a|ỽnaethant ygyt yn llỽt+
laỽ y|tyỽyssaỽc ygyt ar iarll ger bronn kyghor
y|brenhin ar archescop. A gỽedy na ellit eu kym+
ot. aruaetheu a|ỽnaeth y|iarll drỽy nerth iarll
ferỽr. A|henri rigot arglỽyd euas dyuot trỽy
gyuoeth hỽnnỽ tu a|e ỽlat ac ny|s gallaỽd. canys
llywelyn ap ioruerth anuones grufud ap llywelyn y|vap a|diruaỽr lu
ygyt ac ef. a|rys gryc a|e ỽyr hyt yg|karnỽallaỽn
y|racot y ieirll a|e gỽyr. Ac ynteu lyỽelyn a|e holl
allu a|deuth hyt ymab|udryt. Ac yno aros hỽedlev
a|ỽnaeth y|ỽrth y|ỽyr. Ac y|ỽrth dyuodyat y|iarll.
Y|ulỽydyn racỽyneb y|daeth cỽfent o|r ty gỽynn
y|pressỽylaỽ y|gỽyndir yn Jỽerdon. Y|ulỽydyn rac
llaỽ nessaf y|bu varỽ kediuor abbat ystratflur.
Y|ulỽydyn rac llaỽ y|bu varỽ leỽys brenhin freinc
Y|ulỽydyn racỽynep y|delit rys gryc yn llann ar+
thnev y|gann rys vychan y|vap. A|thros castell
llann ymdyfri y|gellygỽyt. Y|ulỽydyn honno y
bu varỽ maredud ap yr arglỽyd rys archidia*+